ދިވެހި ފުލުހުންގެ ހިދުމަތާއި އިސްލާމިކް މިނިސްޓްރީ އާ ދެމެދު ފަހުމުނާމާއެއްގައި ސޮއިކޮށްފިއެވެ.

މި ދެ މުއައްސަސާ ގުޅިގެން މަސައްކަތްކުރުމަށް އެކުލަވައިލާފައިވާ މި ފަހުމުނާމައިގާ ސޮއިކުރުމުގެ ރަސްމިއްޔާތު ބާއްވާފައިވަނީ ޑިސެމްބަރ 16 ވަނަ ދުވަހުއެވެ.

އިސްލާމީ މަރުކަޒުގެ ޖަލްސާކުރާ މާލަމުގައި ކުރިއަށް ގެންދިޔަ މި ރަސްމިއްޔާތުގައި، ފަހުމުނާމާގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރ ޑރ. މުޙައްމަދު ޝަހީމް ޢަލީ ސަޢީދުއެވެ. ދިވެހި ފުލުހުންގެ ހިދުމަތުގެ ފަރާތުން ސޮއިކުރެއްވީ ކޮމިޝަނަރ އޮފް ޕޮލިސް ޢަލީ ޝުޖާޢު އެވެ.

މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ ދިވެހި ފުލުހުންގެ ހިދުމަތަކީ އަބަދުވެސް އެ މިނިސްޓްރީއާ ގުޅިގެން، އެކުއެކީގައި މަސައްކަތްކުރައްވާ މުއައްސަސާއެއް ކަމަށެވެ. ހާއްސަކޮށް މިހާރުގެ ކޮމިޝަނަރ އޮފް ޕޮލިސް ޢަލީ ޝުޖާޢުގެ ލީޑަރޝިޕްގައި މި ގުޅުން އިތުރަށް ބަދަހިވެފައިވާކަން ފާހަގަކުރައްވައި، ވަނީ ޝުކުރު އަދާކުރައްވާފައެވެ.

ރާއްޖޭގެ އަމާންކަން ދެމެހެއްްޓުމަށްޓަކައި އަދި ރަނގަޅު ހެޔޮ ފިކުުރު ދެމެހެއްޓުމަށްޓަކައި ދިވެހި ފުުުހުންގެ ހިދުމަތުން ކުރައްވަމުން ގެންދަވަނީ ވަރަށް ބުރަ، އަދި އެހާމެ ބޮޑު ގައުމީ ޚިދުމަތެއްކަމުގައި ވެސް ވިދާޅުވިއެވެ. އަދި އެ މުއައްސަސާ މަސްއޫލިއްޔަކީ އެ މުއައްސަސާއިން ކުރައްވަމުންދާ މަސައްކަތްތަކަށް އެހީތެރިކަން ދެއްވުންކަން ފާހަގަކުރެއްވިއެވެ.

މީގެއިތުރުން އެ މުވައްސަސާއަށް އަބަދުވެސް ފުރިހަމަ އެއްބާރުލުމާއި އެހީތެރިކަން މިނިސްޓްރީން ދެއްވާނެކަމުގެ ޔަގީންކަން ވެސް މިނިސްޓަރު ވަނީ ދެއްވާފައެވެ.

ސީޕީ ޝުޖާޢު ވިދާޅުވީ ރާއްޖޭގެ މުޖުތަމައު އަމާން މުޖުތަމައަކަށް ހެދުމަށް އެ ހިދުމަތުން ކުރައްވަމުންދާ މަސައްކަތުގައި އިސްލާމިކް މިނިސްޓްރީން އަބަދުވެސް ދެއްވާ އެހީތެރިކަމާއި ބަހައްޓަވާ ގާތްކަން ފާހަގަކުރައްވާ ކަމަށެވެ. އަދި ފުލުހުންނަކީ ދީނީ ގޮތުން ގާބިލް ބަޔަކަށް ހެދުމަށްޓަކައި ކުރަމުންދާ މަސައްކަތުގައި ވެސް މިނިސްޓްރީގެ ފުރިހަމަ އެެއްބާރުލުން ލިބިގެންދާނެކަން މިނިސްޓަރު ދެއްވާފައިވާތީ އެކަމަށްޓަކައި ޝުކުރުއަދާކުރެއްވިއެވެ.

އުންމީދަކީ އެކަޑަމިކް ޕްރޮގްރާމްތަކުގައި އޮފިސަރުންނަށް މިހާރަށްވުރެ އިތުރަށް ފުރުސަތުތައް ލިބިގެން ދިއުންކަމަށް ވެސް ސީޕީ ވަނީ ވިދާޅުވެފައެވެ.