އިކޮނޮމިކް ރިފޯމް އޮފީހުގެ ކޮމިޝަނަރގެ މަގާމަށް އަސްމާ ޝަފީއު ހަމަޖައްސައިފިއެވެ.

މީރާގެ ކުރީގެ ޑެޕިއުޓީ ކޮމިޝަނަރގެ މަގާމު އަދާކުރައްވާފައިވާ އަސްމާ، ދައުލަތުގެ މާލީ ނިޒާމު ހަރުދަނާ ކުރުމަށް އުފެއްދި ރިފޯމް ކޮމިޝަރަގެ މަގާމަށް ހަމައްސަވާފައިވަނީ ޑިސެމްބަރ 17 ވަނަ ދުވަހުއެވެ.

އެ މަގާމަށް ކުރިމަތިލުމަށް ފިނޭންސް މިނިސްޓްރީން ހުޅުވައިލީ މި މަހުގެ 4 ވަނަ ދުވަހުއެވެ. އަދި މުއްދަތު ހަމަވެފައިވަނީ 8 ވަނަ ދުވަހުއެވެ.

އެ މަގާމުގެ މަސްއޫލިއްޔަތުތަކުގެ ތެރޭގައި ނެޝަނަލް ރިފޯމު އެޖެންޑާގައި ހިމެނޭ ކަންކަން ތަންފީޒުކުރުމުގައި އެންމެ އިސްކޮށް މަސައްކަތްކުރުމާއި ރިފޯމާ ގުޅުން ހުރި ކަންކަމުގައި ފިނޭންސް މިނިސްޓަރަށާއި މިނިސްޓަރުގެ އެޑްވައިޒަރަށް ލަފާ ދިނުން ހިމެނެއެވެ.

މީގެއިތުރުން އިގްތިސޯދު ސިންދަފާތު ކުރުމުގެ މަސައްކަތްތަކާ ގުޅުން ހުރި ކަންކަން މެކްރޯ އިކޮނޮމިކް ސްޓެބިލިޓީ އެންޑް ރެޒިލިއަންސްގެ ސްޓްރެޓެޖީތައް އެކުލަވާލައި ތަންފީޒު ކުރުން ވެސް ހިމެނެއެވެ.

14 އަހަރު މީރާގައި މަސައްކަތްކުރެއްވި އަސްމާ ވަނީ އެ އިދާރާގެ ޑެޕިއުޓީ ކޮމިޝަނަރުގެ މަގާމު އަދާކުރައްވާފައެވެ. އޭނާގެ ފަސް އަހަރުގެ ދައުރު ހަމަވީ މިދިޔަ އޮކްޓޯބަރު 31 ވަނަ ދުވަހުއެވެ.