ފާއިތިު 24 ގަޑިއިރު އެންމެގިނައިން ވާރޭ ވެހުނީ އަލިފުއްޓަށް ކަމަށް މެޓް އޮފީހުން ހާމަކޮށްފިއެވެ.

އެ އޮފީހުން ހާމަކުރައްވާފައިވާ ތަފާސްހިސާބަށް ބަލާއިރު، އެރަށަށް ވަނީ 67.2 މިލިލީޓަރުގެ ވާރޭ ވެހިފައެވެ. ދެން އެންމެގިނައިން ވާރޭ ވެހުނީ އއ. ތޮއްޑޫ އަށެވެ. އެއީ 65.9 މިލިލީޓަރުގެ ވާރޭއެވެ.

މީގެއިތުރުން ނ. މާފަރަށް 58.7 މިލިލީޓަރުގެ ވާރޭ، ށ. ކޮމަންޑޫއަށް 54.1 މިލިލީޓަރުގެ ވާރޭ ވެހިފައި ވެއެވެ.

މިއަދުގެ މޫސުން ކުރިއަށްލަފާކުރާގޮތަށް ބަލައި، މެޓް އޮފީހުން ނެރެފައިވާ މޫސުމީ ބުލެޓިންގައި ބުނެފައިވަނީ ދެކުނުގެ ރަަށްތަކަށް ކެރީގެ އަސަރުކުރުން އެކަށީގެންވާ ކަމަށެވެ. އަދި އުތުރާއި މެދުރާއްޖެތެރޭގެ ރަށްތަކަށް ވިއްސާރަކޮށް، ބޯކޮށް ވާރޭވެހި ގުގުރުން އެކަށީގެންވާ ކަމަށެވެ.

އެ އިދާރާ އިން އިތުރަށް ވިދާޅުވީ އުތުރުގެ އަތޮޅުތަކަށް ގަޑިއަކު 8 މޭލާއި 18 މޭލާ ދެމެދުގައި ވައި ޖެހޭއިރު، އެހެން ހިސާބުތަކަށް 13 މޭލާއި 23 މޭލާ ދެމެދުގައި ވައި ޖެހޭނެ ކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައި ގަދަވުން އެކަށީގެންވާ ކަމަށެވެ.

އުތުރުގެ ކަނޑުތައް އާދައިގެވަރަކަށް ގަދަވާއިރު، އެހެން ހިސާބުތަކުގައި ގަދަވާނެ ކަމަށާއި ވިލާގަނޑުގައި އިތުރަށް ގަދަވާނެ ކަމަށް ވެސް މެޓް އޮފީހުން ހާމަކުރައްވައެވެ. އަދި އުތުރުގައި ރާޅުގެ އުސްމިން ތިން ފޫޓާއި ފަސް ފޫޓަށް ހުންނައިރު، ދެކުނުގައި ހުންނާނީ 4 ފޫޓާއި 7 ފޫޓަށް ކަމަށް ވެސް މެޓުން ވިދާޅުވެއެވެ.