މާދަމާ އިން ފެށިގެން ރާއްޖޭގެ މޫސުން އިތުރަށް ގޯސްވާނެކަމަށް މޫސުމާއިބެހޭ ގައުމީ އިދާރާ އިން ވިދާޅުވެއްޖެއެވެ.

އެ އިދާރާ އިން ވިދާޅުވި މިއީ ހުޅަނގު މޫސުމް ނިމި، އިރުވައި މޫސުމް ފެށޭ ދުވަސްވަރު ކަމަށެވެ. އެހެންކަމުން ރާއްޖެ ސަރަހައްދުގައި ކޮޅިގަނޑުތައް އުފެދުމުގެ ފުރުސަތު ވަރަށް ބޮޑުވާނެ ކަމަށް ވިދާޅުވިއެވެ.

އެގޮތުން ބެންގާލް ކަނޑުގައި އުފެދުނު ކޮޅިގަނޑު ޓަމިލްނާޑޫއާ ހިސާބަށް ކުރިއަށް އޮތް ދުވަސްތަކުގައި ފޯރާނެ ކަމަށާއި ރާއްޖޭގެ ދެކުނުން ކަނޑުގެ ސަރައްދުގައި ކޮޅިގަނޑެއް އުފެދިފައިވާ ކަމަށް ވެސް ވިދާޅުވެއެވެ. އަދި މާދަމާ އިން ފެށިގެން މެދު ރާއްޖެތެރެ އާއި ދެކުނަށް މޫސުން އިތުރަށް ގޯސްވާނެ ކަމަށް ލަފާކުރެވޭ ކަމަށެވެ. އަދި ވައިގަދަވެ، ކަނޑުތައް ގަދަވާނެ ކަމަށް ވެސް ވަނީ ލަފާކުރައްވާފައެވެ.

ހަމަމިއާއެކު ކަނޑު ގަދަވުމުގެ ސަބަބުން ބައެއް ރަށްރަށަށް އުދައިގެ އަސަރު ކުރުން އެކަށީގެންވާ ކަމަށް ވެސް ވިދާޅުވެފައި ވެއެވެ.

އެ އިދާރާ އިން ނެރެފައިވާ މޫސުމީ ބުލެޓިންގައި ބުނެފައިވަނީ މިއަދު ވެސް ދެކުނުގެ ރަަށްތަކަށް ކެރީގެ އަސަރުކުރުން އެކަށީގެންވާ ކަމަށެވެ. އަދި އުތުރާއި މެދުރާއްޖެތެރޭގެ ރަށްތަކަށް ވިއްސާރަކޮށް، ބޯކޮށް ވާރޭވެހި ގުގުރުން އެކަށީގެންވާ ކަމަށެވެ.

މީގެއިތުރުން އުތުރުގެ އަތޮޅުތަކަށް ގަޑިއަކު 8 މޭލާއި 18 މޭލާ ދެމެދުގައި ވައި ޖެހޭއިރު، އެހެން ހިސާބުތަކަށް 13 މޭލާއި 23 މޭލާ ދެމެދުގައި ވައި ޖެހޭނެ ކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައި ގަދަވުން އެކަށީގެންވާ ކަމަށެވެ.

އުތުރުގެ ކަނޑުތައް އާދައިގެވަރަކަށް ގަދަވާއިރު، އެހެން ހިސާބުތަކުގައި ގަދަވާނެ ކަމަށާއި ވިލާގަނޑުގައި އިތުރަށް ގަދަވާނެ ކަމަށް ވެސް މެޓް އޮފީހުން ހާމަކުރައްވައެވެ. އަދި އުތުރުގައި ރާޅުގެ އުސްމިން ތިން ފޫޓާއި ފަސް ފޫޓަށް ހުންނައިރު، ދެކުނުގައި ހުންނާނީ 4 ފޫޓާއި 7 ފޫޓަށް ކަމަށް ވެސް މެޓުން ވިދާޅުވެއެވެ.