ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ގުޅުންހުރި ކޮރަޕްޝަންގެ މައްސަލައިގާ ޖިނާއީ ތަހުގީގެއް ދިވެހި ފުލުހުންގެ ހިދުމަތުން ފަށައިފިއެވެ.

ފުލުހުން މީސްމީޑިއަށް ހާމަކުރައްވާފައިވާ ގޮތުގައި މިއީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދީފައިވާކަމަށް ބެލެވޭ މައްސަލައެއް ފެންމަތިވުމުން ހިންގާ ޖިނާއީ ތަހުގީގެއް ކަމަށެވެ.

މިއީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދިން ކަމަށް ބުނާ މައްސަލައެކެވެ. މި މައްސަލަ ހޫނުވެފައިވަނީ ބިންވެރިޔާ ސްކީމްގެ ދަށުން ގޯއްޗަށް ޝަރުތު ހަމަނުވާ ބަޔަކަށް ގޯތި ދޫކޮށްފައި ވަނިކޮށް، އޭގެތެރެއިން ދެ ބިމެއްގެ އިންފާރު ރޭނުމުގެ ހުއްދައަށް ހައުސިންގ މިނިސްޓްރީގައި އެދުމުންނެވެ.

އެހެންކަމުން ހައުސިންގ މިނިސްޓްރީން ވަނީ އެއީ ސްކީމްގެ ދަށުން ދޫކުރި ގޯތިތަކެއް ނޫން ކަމަށް އެޗްޑީސީއަށް އަންގާފައެވެ.

މީސްމީޑިއާގައި ދައުރުވާ ލިޔެކިޔުމުގައި ހުއްދަ ހޯދުމަށް އެދުނީ އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދުގެ ކޮއްކޮ މުހައްމަދު ފަޒީލް ރަޝީދާއި އަބްދުލްމަޖީދު މާހިރެވެ.