ރިސަރޗު ފައުންޑޭޝަންގެ މަގްސަދަކީ ގައުމުގެ ކުރިއެރުމަށާއި މުސްތަގުބަލަށް ކަންތައްތަކެއް ކޮށްދިނުން ކަމުގައި ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވެއްޖެއެވެ.

އެމްޑީ މިފަދައިން ވިދާޅުވީ ސްޓެލްކޯ ރިސަރޗް ފައުންޑޭޝަނާއި އެ ފައުންޑޭޝަންގެ ވެބްސައިޓް އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

މި ރަސްމިއްޔާތުގައި އެމަނިކުފާނު ވިދާޅުވީ ރިސަރޗް ފައުންޑޭޝަނެއް އުފައްދަން ޖެހުނު އެންމެ ބޮޑު އެއް ސަބަބަކީ އެކި ދާއިރާތަކުން ކިޔަވައިގެންތިބި ތައުލީމީ ޒުވާނުން ކުންފުނީގައި ތިބުން ކަމަށެވެ. އަދި އެ ކުންފުންޏަކީ ރިސޯސްފުލް ކުންފުންޏަކަށްވެފައި، އެފަދަ މަސައްކަތެއް ކުރާނެ ގާބިލްކަމާއި، ވަސީލަތެއް ސްޓެލްކޯގައި ހުރިކަން ފާހަގަކުރެއްވިއެވެ.

"މި ރިސަރޗް ފައުންޑޭޝަން މެދުވެރިކޮށް މިގައުމަށް، ގައުމުގެ ކުރިއެރުމަށް މުސްތަގުބަލަށް ކަންތައްތަކެއް ކޮށްދިނުން އެއީ މަގުސަދަކީ. އަޅުގަނޑުމެން ބޭނުންވަނީ ތިބޭފުޅުންލައްވައި ގައުމަށް ހިދުމަތްކޮށްދޭން." އެމްޑީ ވިދާޅުވިއެވެ.

މީގެއިތުރުން މިއީ ހަމައެކަނި ޖަލްސާއެއް ބާއްވައި، ނިންމާލާ ރިސަރޗް ފައުންޑޭޝަނަކަށް ވެގެން ނުވާނެ ކަމަށާއި ވިސްނުމާއި ފިކުރުކުރުމުގެ ތެރެއިން ގައުމަށް މިކަމުގެ ފައިދާ ކުރަންވާނެ ކަމަށް ވިދާޅުވިއެވެ. އަދި "އާދައިގެ ގޮތަކަށް ނޫން. އިންތިހާއަށް ފައިދާ ކުރަންވާނެ" ކަމުގައި ވެސް އެމްޑީ ވިދާޅުވިއެވެ.

ސްޓެލްކޯ ހެޑް އޮފީހުގައި ބޭއްވި ރަސްމިއްޔާތެއްގައި މި ރިސަރޗް ފައުންޑޭޝަނާއި އެ ފައުންޑޭޝަންގެ ވެބްސައިޓް އިފްތިތާހުކޮށްދެއްވީ އެމްޑީ ހުސައިން ފަހުމީއެވެ.

ސްޓެލްކޯ ރިސަރޗް ފައުންޑޭޝަންގެ މަގްސަދަކީ ރާއްޖޭގެ ރިސަރޗް އަދި އުފެއްދުންތެރިކަމުގެ ދާއިރާ، އައު ހަރުފަތަކަށް ގެންދިއުމެވެ. އެގޮތުން ސައިންސް، ޓެކްނޮލޮޖީ، އިންޖީނިއަރިންގ، އާރޓްސް އަދި މެތެމެޓިކްސް(STEAM) ދާއިރާތައް ކުރި އެރުވުމަށް އެންމެ ޒަމާނީ ދިރާސާތަކާއި، އަލަށް ތައާރަފްވަމުންދާ ޓެކްނޮލޮޖީ ހޯދުމާއިއެކު، އެއަށް އަހުލުވެރިވެ، ގައުމު ތަރައްގީގެ މަގުގައި ކުރިއަށް ދިއުމަށް ބޭނުންވާ ހަރުދަނާ އަދި ޒަމާނީ ހައްލުތައް ހޯދައިދިނުން ހިމެނެއެވެ. އަދި އުމްމީދަކީ މި ފައުންޑޭޝަން މެދުވެރިކޮށް ދިވެހިންނަށް އިތުރު ފުރުސަތުތަކެއް ހޯދައިދިނުމެވެ.

ސްޓެލްކޯ ރިސަރޗް ފައުންޑޭޝަންގެ ވެބްސައިޓް www.srf.mv