އެޗްޑީސީން ގާނޫނާ ހިލާފަށް އެއްވެސް ކަމެއް ކޮށްފައި ނޯންނާނެކަމުގެ ފުރިހަމަ ޔަގީންކަން އެބައޮތްކަމަށް އެ ކުންފުނީގެ މެނޭޖިންގ ޑިރެކްޓަރ ފަޒުލް ރަޝީދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދީފައިވާކަމަށް ބުނެ މީސްމީޑިއާގައި ފަތުރަމުންދާ ވާހަކަތާ ގުޅިގެންނެެ.

ޑިސެމްބަރ 18 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ ބިންވެރިޔާ ސްކީމްގެ ދަށުން ގޯތިތައް ދޭނެ ފަރާތްތައް ކަނޑައަޅަނީ އެޗްޑީސީން ނޫން ކަމަށެވެ. އެއީ ހައުސިންގ މިނިސްޓްރީން ކުރިއަށްގެންދަވާ މަސައްކަތެއް ކަމަށާއި އެ މިނިސްޓްރީން ގޯތި ދޭން ނިންމާފައިނުވާ ބަޔަކަށް އެޗްޑީސީން ގޯއްޗެއް ދީފައިނުވާނެ ކަމަށް ވެސް ވިދާޅުވިއެވެ.

ފަޒުލް ވަނީ މީޑިއާގައި މިހާރު ފެންމަތިވެގެން އުޅޭ ގޯތިތަކުގެ މައްސަލައަކީ ވެސް އެޗްޑީސީން ފާހަގަކޮށް، ކަމާބެހޭ ފަރާތްތަކަށް ހުށަހެޅުއްވި މައްސަލައެއްކަން ފާހަގަކުރައްވާފައެވެ. އަދި އެކުންފުންޏަށް މައްސަލަ ފާހަގަވީ ދެ ގޯއްޗެއްގައި ކަމަށެވެ.

އެކަމާއި ގުޅިގެން ބަލަންޖެހޭ ކަންކަން ބެލުމަށް ހައުސިންގ މިނިސްޓްރީއަށް ހުށަހެޅުއްވީ ވެސް އެޗްޑީސީން އިސްނަގައިގެންކަމަށް ފަޒުލް ވަނީ ވިދާޅުވެފައެވެ.

ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމަށް ބުނާ މައްސަލަ ފުލުހުން ތަހުގީގު ކުރަމުން އަންނައިރު، އެޗްޑީސީގެ ފުރިހަމަ އެއްބާރުލުން މުއައްސަސާތަކަށް ލިބޭނެކަމަށް ވެސް ފަޒުލް ވިދާޅުވިއެވެ.

މީގެއިތުރުން ގޯތިތައް ހަވާލުކުރުމުގައި އަމިއްލަ މަސްލަހަތު ގެންގުޅުނުކަމަށް ބުނެ ވާހަކަތައް ދައްކަނީ ސިޔާސީ މަންފާއަށް ބަޔަކު ފަތުރާ ދޮގު ވާހަކަތަކެއް ކަަމަށް ވެސް ފަޒުލް ވިދާޅުވިއެވެ. އަދި ޖަވާބުދާރީ ނުވެވޭފަދަ އެއްވެސް ކަމެއް ކުރައްވާފައި ނުވާނެކަމަށް ވެސް ވަނީ ވިދާޅުވެފައެވެ.