އަންނައަހަރު ސަރުކާރުގެ ބަޖެޓުން ފައިސާ ލިބެނީ 5 ޕާޓީއަކަށް ކަމުގައި އިލެކްޝަންސް ކޮމިޝަން (އީސީ) އިން ވިދާޅުވެއްޖެއެެވެ.

އެ ކޮމިޝަނުން ވިދާޅުވީ އެ ޕާޓީތަކަކީ އެމްޑީޕީ، ޕީއެންސީ، އަދާލަތު ޕާޓީ، ޖުމްހޫރީ ޕާޓީ އަދި އެމްޑީއޭ ކަމަށެވެ.

ސިޔާސީ ޕާޓީތަކުގެ ގާނޫނުގައި ބަޔާންކޮށްފައިވާ ގޮތުގައި، ދައުލަތުގެ ބަޖެޓުން ފައިސާ ދޫކުރެވޭނީ 10،000 މެންބަރުން ހަމަވާ ޕާޓީތަކަށް އެކަނި ކަަމަށްވާއިރު، ޕީޕީއެމްގެ ދަފްތަރުގައި ވެސް އެ އަދަދަށް މެމްބަރުން ހަމަވެއެވެ. ނަމަވެސް އެ ޕާޓީ މިހާރުވަނީ އުވައިލުމުގެ މަރުހަލާގައެވެ.

ގާނޫނުގައި ވާ ގޮތުގައި ސިޔާސީ ޕާޓީތައް ހިންގުމަށް ދައުލަތުގެ ބަޖެޓުން ދޫކުރެވޭ ފައިސާގެ މިންވަރަކީ ދައުލަތުގެ އަހަރީ ބަޖެޓުގެ 0.2 އިންސައްތައާއި 1.0 އިންސައްތައާ ދެމެދުގެ އަދަދެކެވެ. ފައިސާ ދޫކުރުމުގައި ބަލާނީ ޑިސެމްބަރު 31 ގެ ނިޔަލަށް ކޮންމެ ޕާޓީއެއްގައި ތިބި މެންބަރުންގެ އަދަދަށެވެ.

ފައިބެއަހަރު ދައުލަތުގެ ބަޖެޓުން 6 ސިޔާސީ ޕާޓީއަކަށް ޖުމްލަ 44 މިލިއަން ރުފިޔާ ވަނީ ދޫކޮށްފައެވެ.