ސްޓެލްކޯގެ ރިސަރޗު ފައުންޑޭޝަނަކީ އެ ކުންފުނި އިތުރުހަރުފަތަކަށް ގެންދިއުމަށް މުހިންމު ކޮންޕޯނެންޓެއް ކަމުގައި ސްޓެލްކޯގެ ޑެޕިއުޓީ މެނޭޖިންގ ޑިރެކްޓަރ ޑރ. އަލީ އަޒުވަރު ވިދާޅުވެއްޖެއެވެ.

ސްޓެލްކޯ ރިސަރޗް ފައުންޑޭޝަނާއި އެ ފައުންޑޭޝަންގެ ވެބްސައިޓް އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަޒުވަރު ވިދާޅުވީ ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީގެ އިސްނެންގެވުމާއި ސީދާ ބެއްލެވުމުގެ ދަށުން ކުރަމުންދާ މަސައްކަތްތަކުގެ ތެރެއިން ކުންފުނީގެ ހަޔާތުގައި މިއީ ތާރީހީ ދުވަހެއް ކަމަށެވެ. އަދި މަސައްކަތުގައި އިތުރު ހަރުފަތަކަށް ދިއުމަށް މަގު ކޮށިގެންދާ އުފާވެރި ދުވަހެއް ކަމަށެވެ.

އެގޮތުން ރިސަރޗަކީ ސްޓެލްކޯއާއި ވަރަށް ބޮޑަށް ލާމެހިފައިވާ މަސައްކަތެއްކަން ވަނީ ފާހަގަކުރައްވާފައެވެ. އަދި ކުންފުނިން ފޯރުވައިދޭ ހިދުމަތްތަކުގެ ގޮތުން އެ ހިދުމަތްތައް އެއް ހަރުފަތަކުން އަނެއް ހަރުފަތަށް ގެންދިއުމުގައި އިޖާދީ ބަދަލުތަކާއި، އަމިއްލަ އިސްނެންގެވުމުގެ ތެރެއިން ކުރެވޭ މަސައްކަތަށް ރިސަރޗަކީ ވަރަށް މުހިއްމު ކޮންޕޮނެންޓެއް ކަމަށެވެ.

މީގެއިތުރުން މީގެ ފައިދާ ސްޓެލްކޯއަށާއި، މުޅި ގައުމަށް ވެސް ލިބިގެންދާނެ ކަމަށް ވެސް އެސް.އާރ.އެފްގެ ވައިސް ޗެއަރޕާރސަން ވިދާޅުވިއެވެ.

ސްޓެލްކޯ ރިސަރޗް ފައުންޑޭޝަންގެ މަގްސަދަކީ ރާއްޖޭގެ ރިސަރޗް އަދި އުފެއްދުންތެރިކަމުގެ ދާއިރާ، އައު ހަރުފަތަކަށް ގެންދިއުމެވެ.

އެގޮތުން ސައިންސް، ޓެކްނޮލޮޖީ، އިންޖީނިއަރިންގ، އާރޓްސް އަދި މެތެމެޓިކްސް (STEAM) ދާއިރާތައް ކުރި އެރުވުމަށް އެންމެ ޒަމާނީ ދިރާސާތަކާއި، އަލަށް ތައާރަފްވަމުންދާ ޓެކްނޮލޮޖީ ހޯދުމާއިއެކު، އެއަށް އަހުލުވެރިވެ، ގައުމު ތަރައްގީގެ މަގުގައި ކުރިއަށް ދިއުމަށް ބޭނުންވާ ހަރުދަނާ އަދި ޒަމާނީ ހައްލުތައް ހޯދައިދިނުން ހިމެނެއެވެ. އަދި އުމްމީދަކީ މި ފައުންޑޭޝަން މެދުވެރިކޮށް ދިވެހިންނަށް އިތުރު ފުރުސަތުތަކެއް ހޯދައިދިނުމެވެ.