ހައުސިންގ ޑިވެލޮޕްމަންޓް ކޯޕަރޭޝަންގެ ޗެއަރމަން ފިޔަވައި، އެ ބޯޑުގެ ހުރިހައި މެމްބަރުން ސަސްޕެންޑް ކޮށްފިއެވެ.

ޕްރައިވަޓައިޒޭޝަން އަދި ކޯޕަރަޓައިޒޭޝަން ބޯޑުން، އެޗްޑީސީގެ މެނޭޖިންގ ޑިރެކްޓަރު އިބްރާހިމް ފަޒުލް ރަޝީދު ވެސް ހިމެނޭގޮތަށް އެ ބޭފުޅުން ސަސްޕެންޑުކޮށްފައި މިވަނީ އެޗްޑިސީ އާ ގުޅޭގޮތުން ދިވެހި ފުލުހުންގެ ހިދުމަތުން މިހާރުކުރަމުންދާ ޖިނާއީ ތަހުގީގަކާ ގުޅިގެންނެވެ.

ޕްރައިވަޓައިޒޭޝަން އަދި ކޯޕަރަޓައިޒޭޝަން ބޯޑުން ވިދާޅުވީ މިއީ އެ ތަހުގީގަށް ޖާގަދީ ފުރިހަމަ އެހީތެރިކަން ދިނުމުގެ ގޮތުން އެޅި ފިޔަވަޅެއް ކަމަށެވެ.

"އެ ތަހުގީގު ނިމި މި ބޯޑުން ވަކިގޮތެއް އަންގަންދެން، އެ ކުންފުނީގެ ޗެއަރމަން އަހްމަދު ނާސިފް ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން މިއަދުން ފެށިގެން ވަނީ ސަސްޕެންޑްކޮށްފަ."

މީގެއިތުރުން އެ ކުންފުނީގެ މެނޭޖިންގ ޑިރެކްޓަރު އިބްރާހިމް ފަޒުލް ރަޝީދު ވެސް އެ ބޯޑުން ވަކި ގޮތެއް އަންގަންދެން އޮފީހަށް ނުނިކުމެވޭ ގޮތަށް ސަސްޕެންޑްކޮށްފައިވާ ކަމަށް ވަނީ ވިދާޅުވެފައެވެ.

ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދިން ކަމަށް ބުނާ މައްސަލަ ހޫނުވެފައިވަނީ އެ ސްކީމްގެ ދަށުން ގޯއްޗަށް ޝަރުތު ހަމަނުވާ ބަޔަކަށް ގޯތި ދޫކޮށްފައި ވަނިކޮށް، އޭގެތެރެއިން ދެ ބިމެއްގެ އިންފާރު ރޭނުމުގެ ހުއްދައަށް ހައުސިންގ މިނިސްޓްރީގައި އެދުމުންނެވެ.

އެހެންކަމުން ހައުސިންގ މިނިސްޓްރީން ވަނީ އެއީ ސްކީމްގެ ދަށުން ދޫކުރި ގޯތިތަކެއް ނޫން ކަމަށް އެޗްޑީސީއަށް އަންގާފައެވެ.