ރާއްޖެއަށް މިހައިތަަނަށް ލައްކައަކަށް ވުރެ ގިނަ ފަތުރުވެރިން އަތުވެއްޖެއެވެ.

ޓޫރިޒަމް މިނިސްޓްރީގެ ތަފާސްހިސާބުން ދައްކާ ގޮތުގައި ޑިސެމްބަރ މަހުގެ ފުރަތަމަ 17 ދުވަސްތެރޭ ރާއްޖެއަށް 103،560 ފަތުރުވެރިން ވަނީ ޒިޔާރަތްކޮށްފައެވެ. މިއީ ފައިބެއަހަރުގެ މި މުއްދަތާއި އަޅާ ބަލާއިރު 2،9 އިންސައްތައިގެ އިތުރުވުމެކެވެ. ފައިބެއަހަރުގެ ޑިސެމްބަރ މަހުގެ ފުރަތަމަ 17 ދުވަސްތެރޭ ރާއްޖެއަށް އައިސްފައިވަނީ 100،652 ފަތުރުވެރިންނެވެ.

އެވްރެޖްކޮށް ކޮންމެ ދުވަހަކު ރާއްޖެއަށް 6092 ފަތުރުވެރިން އަންނައިރު، މިމަހުގެ ކުރީކޮޅު ރާއްޖެއަށް ކޮންމެ ދުވަހަކު އަންނަ ފަތުރުވެރިންގެ އަދަދުތައް ހުރީ 5000 ގައެވެ. ފަތުރުވެރިންގެ ޖުމްލަ އަދަދަށް ބަލާއިރު، އަހަރުގެ މިހައިތަނަށް ވަނީ 1.9 މިލިޔަން ފަތުރުވެރިން ޒިޔާރަތްކޮށްފައެވެ.

ފައިބެއަހަރުގެ މިހައިތަނަށް ރާއްޖެއަށް އައިސްފައިވާ 1.7 މިލިޔަން ފަތުރުވެރިންނާއި އަޅާ ބަލާއިރު، 8.8 އިންސައްތައިގެ އިތުރުވުމެކެވެ.

ރާއްޖެއަށް އެންމެގިނަ ފަތުރުވެރިން އަންނަގައުމުތަކުގެ ލިސްޓުގެ އެންމެކުރީގައި ޗައިނާ އޮތީ 259،222 ފަތުރުވެރިންނާއެކުގައެވެ. ދެވަނައިގާ ރަޝިޔާ އޮތީ 214،271 ފަތުރުވެރިންނާއެކުގައެވެ. އަދި އިނގިރޭސިވިލާތް ތިންވަނައިގާ އޮތީ 170،906 ފަތުރުވެރިންނާއެކުގައެވެ.