މާލެ ވޯޓަރ އެންޑް ސުވަރެޖް ކޮމްޕެނީ (އެމްޑަބްލިއުއެސްސީ) ގެ ޑެޕިއުޓީ މެނޭޖިންގ ޑިރެކްޓަރުގެ މަގާމުގައި ހުންނެވި މުޙައްމަދު ފަޒީލް ރަޝީދު ސަސްޕެންޑްކޮށްފިއެވެ.

އޭނާ މަގާމުން ސަސްޕެންޑްކުރީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ ގުޅޭގޮތުން ދިވެހި ފުލުހުންގެ ހިދުމަތުން ކުރިއަށްގެންދާ ތަހުގީގަކަށް ފުރިހަމައަށް ޖާގަދީ، އެހީތެރިވުމުގެ ގޮތުން ކަމަށް އެމްޑަބްލިއުއެސްސީން ވިދާޅުވިއެވެ.

"އޭނާ ސަަސްޕެންޑުކުރީ މިއަދު. އަދި ވަނީ ހުރިހައި ޒިންމާތަކުން ވެސް އެކަހެރިކޮށްފަ." އެ ކުންފުނިން ވިދާޅުވިއެވެ.

މީގެއިތުރުން އޭނާ ސަސްޕެންޑްކުރީ ކުންފުނީގެ ބޯޑުން ކަމަށް ވެސް ވަނީ ވިދާޅުވެފައެވެ.

އެޗް.ޑީސީ އާއި ގުޅޭގޮތުން މޯލްޑިވްސް ޕޮލިސް ސަރވިސަސް އިން ކުރިޔަށް ގެންދާ ތަހުޤީޤަށް ފުރިހަމަޔަށް އެހީތެރިވުމުގެ ގޮތުން މިކުންފުނީގެ ޑީ.އެމް.ޑީ މުޙައްމަދު ފަޒީލް ރަޝީދު މިއަދުން ފެށިގެން ހުރިހާ ޒިންމާ ތަކަކުން ވަކިކޮށް އޮފީހަށް ނުނިކުމެވޭ ގޮތަށް ސަސްޕެންޑް ކުރެވިފައެވެ.

— Male' Water and Sewerage Company Pvt. Ltd. (@MWSC_Official) December 19, 2024

އޭނާ ސަސްޕެންޑުކޮށްފައި މިވަނީ ބިންވެރިޔާ ސްކީމުގެ ދަށުން ގޯތި ލިބިފައިނުވާ ބަޔަކަށް ގޯތިތަކެއް ދީފައިވާކަމަށް ތުހުމަތުުރެވޭ މައްސަލައެއް ފުލުހުން ތަހުގީގުކުރަމުން އަންނަދަނޑިވަޅެއްގައެވެ.

މި މައްސަލާގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ވަނީ އެޗްޑީސީގެ ބޯޑު މެންބަރުންގެ ތެރެއިން ޗެއަރމަން ފިޔަވައި ހުރިހާ މެންބަރުން ސަސްޕެންޑްކޮށްފައެވެ.

އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރުގެ މަގާމުގައި ހުންނެވި މުހައްމަދު ފަޒީލް ރަޝީދަކީ އެޗްޑީސީގެ މެނޭޖިންގ ޑިރެކްޓަރު އިބްރާހިމް ފަޟުލް ރަޝީދުގެ ބޭބެއެވެ. ގޯތީގެ މައްސަލައިގައި ސޯޝަލް މީޑިއާގައި ދައުރުވަމުންދަނީ ފަޒީލްގެ ނަމުގައިވާ ލިޔުމެކެވެ.

ފުލުހުން ތަހުގީގުކުރައްވަމުންދަނީ ޑޮކިއުމަންޓުތަކެއް ފޯޖުކޮށްފައިވާ ކަމަށް ތުހުމަތު ކުރެވޭ މައްސަލައެކެވެ. މިއީ ފުލުހުންނަށް ލިބިފައިވާ މައުލޫމާތަކާ ގުޅިގެން ފުލުހުން އިސްވެ ފެށި ތަހުގީގެއް ކަމަށްވެސް ފުލުހުން ވިދާޅުވެއެވެ.