ހަޔަރ އެޑިއުކޭޝަން މިނިސްޓަރ ޑރ. މަރްޔަމް މާރިޔާ ހދ. ހަނިމާދޫއަށް ވަޑައިގެން ހަނިމާދޫ އެގްރިކަލްޗަރ ސެންޓަރަށް ޒިޔާރަތް ކުރައްވައިފިއެވެ.

މި ދަތުރުފުޅުގައި މިނިސްޓަރ ވަނީ އެ ސެންޓަރު ބައްލަވާލައްވައި، ސެންޓަރުގެ މުވައްޒަފުންނާ ބައްދަލުކުރައްވާފައެވެ. މި ބައްދަލުވުމުގައި ސެންޓަރުގައި މިވަގުތު ކުރިއަށްގެންދާ މަސައްކަތްތަކާއި، އެ މަސައްކަތްތައް ކުރިއަށްގެންދިއުމަށް ހުރި ދަތިތައް ހައްލުކުރުމާ ބެހުމާ ބެހޭގޮތުން މަޝްވަރާކުރެއްވިއެވެ.

މީގެއިތުރުން ޗައިނާއިން ރާއްޖޭގައި ހިންގުމަށް ހަމަޖެހިފައިވާ 'އެސިސްޓެންޓް ޕްރޮޖެކްޓް އޮން ކޮކޮނަޓް ޓްރީ ޕެސްޓް ކޮންޓްރޯލް އިން މޯލްޑިވްސް' ޕްރޮޖެކްޓް ހަވާލުކުރެވިފައިވާ ޗައިނީސް އެކަޑަމީ އޮފް ޓްރޮޕިކަލް އެގްރިކަލްޗަރަލް ސައިންސެސް (ކެޓަސް)ގެ ފަންނީ ޓީމާވެސް ބައްދަލުކުރައްވާފައެވެ.

މި ބައްދަލުވުމުގައި ކެޓަސްގެ ކުރު ތައާރަފަކާއި ޕްރޮޖެކްޓްގެ މަސައްކަތްތައް ރޭވިފައިވާ ގޮތް ވަނީ މިނިސްޓަރާ ހިއްސާކުރެވާފައެވެ. އަދި ފަންނީ ޓީމުން އެއްކޮށްފައިވާ ޕެސްޓްގެ ސާމްޕަލްތައް ވެސް މިނިސްޓަރަށް ހިއްސާކުރައްވާފައެވެ،

މިއީ މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އާއި ވަގުތީގޮތުން ހަވާލުވެހުންނަވައި، ރާއްޖޭގެ ދަނޑުވެރިކަމުގެ ދާއިރާ ތަރައްގީކުރުމަށް ކުރެވޭ މަސައްކަތްތައް ބަލައި، އެ މަސައްކަތްތަކަށް ބޭނުންވާ އެހީތެރިކަން ފޯރުކޮށްދިނުމަށް ކުރެއްވި ދަތުރުފުޅެކެވެ.