ނިމިދިޔަ އެމްޑީޕީ ސަރުކާރުން ހަދާފައިވާ އެއްބަސްވުންތަކަކަށް ޢަމަލުކުރަން ނުޖެހޭ ކަމަށް އެޓަރނީ ޖެނެރަލް (އޭޖީ) އިން ނިންމައިފިއެވެ.

އެ އޮފީހުން ނެރުއްވި ބަޔާނެއްގައި ވިދާޅުވީ ނިމިދިޔަ ސަރުކާރުން 28 ނޮވެންބަރު 2022 ގައި އެކުލަވާލި އުސޫލުގެ ދަށުން ސޮއިކޮށްފައިވާ 9 ސެޓްލްމަންޓް އެއްބަސްވުމަކީ ބާތިލު އެއްބަސްވުންތަކެއް ކަމަށެވެ. އަދި އެ އެއްބަސްވުންތަކަށް ޢަމަލުކުރަން ނުޖެހޭ ކަމަށް ނިންމައި، ކަމާބެހޭ ދައުލަތުގެ އިދާރާތަކަށް ބަންޑާރަނައިބު އަންގާފައިވާ ކަމަށެވެ.

އެމްޑީޕީގެ ސަރުކާރުން ބަދަލުގެ ގޮތުގައި އެކި ފަރާތްތަކަށް ދޭން ނިންމާފައިވާ ބިލިޔަނަކަށްވުރެ ގިނަ ރުފިޔާ ހުއްޓުވައި، ބަންޑާރަ ނައިބުގެ އޮފީހުން ނެރުއްވި ބަޔާނުގައި ވިދާޅުވީ ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި ޢަމަލުކުރާނެ ގޮތުގެ އުސޫލަކީ ޤާނޫނީ ހައިސިއްޔަތާއި ބާރު ލިބިގެންނުވާ އުސޫލެއްކަމަށެވެ. 

އެހެންވެ، އެ އުސޫލުގެ ދަށުން އުފައްދާފައިވާ "މައްސަލަ ހައްލުކުރުމަށް ލަފާދޭ ކޮމިޓީ " ރައީސް އުވާލައްވައި، ސެޓްލްމަންޓް އެއްބަސްވުމުގައި ސޮއިކޮށްފައިވާ މައްސަލަތައް ދިރާސާކުރުމަށް އޭޖީ އޮފީހަށް ފޮނުއްވާފައިވާކަމަށެވެ.