މައްސަލަޖެހިގެން އުޅޭ ބިންވެރިޔާ ސްކީމްގެ ލިޔެކިޔުންތަކަށް މިހާތަނަށް ބެލިބެލުމުން މައްސަލަ އުފެދިގެން އުޅޭ ލިޔެކިޔުންތައް ދޫކޮށްފައިވަނީ މިދިޔަ ސަރުކާރުގައި ކަމަށް ދިވެހި ފުލުހުންގެ ހިދުމަތުން ވިދާޅުވެއްޖެއެވެ.

އެ އިދާރާ އިން ބޭއްވި ނޫސްވެރިންގެ ބައްދަލުވުމުގައި ސެންޓްރަލް އިންވެސްޓިގޭޝަން ކޮމާންޑްގެ ހެޑް، އެސިސްޓަންޓް ކޮމިޝަނަރ އޮފް ޕޮލިސް އަބްދުﷲ ޝަރީފް ވިދާޅުވީ ބައެއް ލޮޓްތަކަށް އެއް ފަރާތަކަށްވުރެ ގިނަ ފަރާތް ހުށައަޅާފައިވާ ކަމަށެވެ. އަދި އެކަމާއި ގުޅިގެން އެއީ ސައްހަ ލިޔެކިޔުންތަކެއްތޯ ބެލުމަށް އެޗްޑީސީން ހައުސިންގ މިނިސްޓްރީގައި އެދިފައިވާކަމަށެވެ.

މީގެއިތުރުން އެ ބުނާ ލިޔެކިޔުންތަކަކީ ބިންވެރިޔާގެ ލިސްޓުގައި ނުހިމެނޭ ފަރާތްތަކަކުން ހުށަހަޅާފައިވާ ލިޔެކިޔުންތަކެއްކަމަށް ހައުސިންގ މިނިސްޓްރީން ހާމަކޮށްފައިވާކަމަށް ވެސް ވިދާޅުވިއެވެ.

ޕޯޓަލް މެދުވެރިކޮށް ލިޔުން ހޯދުމަށް ބިން ލިބުނު ފަރާތްތަކުން ހުށަހަޅަމުން އަންނައިރު، މި ލޮޓްތަކުގެ މައްސަލައިގައި އިތުރު ކަންކަން ފާހަގަވިކަން ފުލުހުން ވަނީ ހާމަކުރައްވާފައެވެ.

އެގޮތުން ބިންވެރިޔާ ސްކީމުގެ ދަށުން ޝަރުތު ހަމަނުވާ ފަރާތްތަކުގެ ތެރެއިން ތިން ލޮޓެއްގެ މި ފަދަ މައްސަލައެއް ތަހުގީގުން ފާހަގަވެފައިވާ ކަމަށާއި ބައެއް ލޮޓްތަކާ ގުޅިގެން އިމާރަތް ކުރުމުގެ ހުއްދަ ހޯދުމަށް ޕޯޓަލް މެދުވެރިކޮށް ލިޔުން ހުށަހަޅާފައިވާ ކަަމަށް ވިދާޅުވިއެވެ.

މީގެއިތުރުން އެއް ފަރާތަށް ވުރެ ގިނަ ފަރާތްތަކުގެ ނަމުގައި ލިޔުން ހުށަހަޅާފައިވާ ކަން ވެސް ފާހަގަވެފައިވާ ކަމަށް ފުލުހުން ވަނީ ވިދާޅުވެފައެވެ.