އައްޑޫ ސިޓީން މާލެއަށް ދަތުރުކުރަމުންދިޔަ "ސީމެކްސް" ބޯޓުން ދަތުރުކުރި ފަޅުވެރިއެއް ކަމަށްވާ ރާޖު ކުމާރު ހޯދުމުގެ މަސައްކަތް އެމްއެންޑީއެފް އިން ހުއްޓާލައިފިއެވެ.

މި ހާދިސާގެ އަދާހަމަ ހާމަކުރައްވަމުން އެމްއެންޑީއެފް އިން ވިދާޅުވީ މިހާދިސާއާ ގުޅިގެން ގެއްލުނު މީހާ ހޯދުން މިހާރު މެދުކަނޑާލާފައިވާ ކަމަށެވެ. މި މަސައްކަތް މެދުކަނޑާލިއިރު، މި މަހުގެ 17 އަދި 18 ވަނަ ދުވަހު 304 ނޯޓިކަލް މޭލުގެ ސަރަހައްދެއް ބަލައިފައިވާ ކަމަށް ވަނީ ވިދާޅުވެފައެވެ.

މީގެއިތުރުން 19 ވަނަ ދުވަހު ފޯއްމުލައް ސިޓީގެ ވަށައިގެން ބަލައިފައިވާ ކަމަށާއި އޮޕަރޭޝަން ކުރިއަށްގެންގޮސްފައި ވަނީ ކަނޑުމަގުން ކަމަށް ވެސް ވަނީ ވިދާޅުވެފައެވެ. އެހެންނަމަވެސް އަދިވެސް ގެއްލުނު މީހާ ފެނިފައި ނުވާ ކަމަށް ވަނީ ހާމަކުރައްވާފައެވެ.

އެމްއެންޑީއެފް އިން ނޫސްވެރިންނަށް މައުލޫމާތު ހިއްސާކުރުމަށް ހަދާފައިވާ ޓެލެގްރާމް ގުރޫޕުގައި ރާޖު ކުމާރު ހޯދުމަށް ޔޫއޭވީ ބޭނުން ނުކުރީ ކީއްވެތޯ އަދި ބޭނުންކުރެވޭ ހާލަތަކީ ކޮބައިތޯ ނޫސްވެރިން ސުވާލު ކުރުމުން މިހައިތަނަށް ޖަވާބު ދެއްވާފައެއް ނުވެއެވެ.

އައްޑޫ ސިޓީން މާލެއަށް ދަތުރުކުރަމުންދިޔަ "ސީމެކްސް" ބޯޓު އައްޑު އިން ފުރީ ޑިސެމްބަރ 16 ވަނަ ދުވހުގެ ރޭ 11:30 ގައި ކަމަށާއި އޭރު އެ ބޯޓުގެ ފަޅުވެރިއެއް ކަމަށްވާ ނޭޕާލުގެ ރާޖު ބޯޓުގައި ހުރި ކަަމަށް ފުލުހުންނަށް މައުލޫމާތު ލިބިފައިވާ ކަމަށް ވަނީ ހާމަކުރައްވާފައެވެ. އަދި އެރޭ ދަންވަރު 1:15 ގައި ބޯޓުގެ ކެޕްޓަނާ، އޭނާ ވާހަކަ ދެއްކި ކަމަށް ވެސް ބެލި ބެލުމުން އެންގޭ ކަމަށް ފުލުހުން ވިދާޅުވެއެވެ.