ސްޓެލްކޯގެ ހިދުމަތަށް 75 އަހަރުފުރި އަލިމަސްޔޫބީލް ފާހަގަކުރަމުން އަންނައިރު، ހުރިހައި ޝުކުރަކާއި ތައުރީފެއް ހައްގުވަނީ ސިނާއަތުގެ ހިދުމަތްތެރިންނަށް ކަމުގައި އެ ކުންފުނީގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވެއްޖެއެވެ.

'އެކްސް' ގައި ކުރައްވާފައިވާ ޕޯސްޓެއްގައި ވަނީ ކަރަންޓުގެ ހިދުމަތުގެ އަލިމަސްޔޫބީލާއި ހަމަޔަށް ވާސިލްވެފައިވާއިރު، ލިބޭ އެންމެ ބޮޑު ހިތްހަމަޖެހުމަކީ ގައުމު ބިނާކުރުމަށް އިހްލާސްތެރިކަމާއެކު ކޮށްދީފައިވާ އަދި ކޮށްދެމުންގެންދާ އަގުހުރި މަަސައްކަތްތައް ކަމަށެވެ.

މީގެއިތުރުން މި ކާމިޔާބީގެ ވާހަކަތައް ތާރީޚުގައި ލިޔެވިގެންދާއިރު، މި ސިނާއަތުގައި މަސައްކަތްކުރައްވާ މުވައްޒަފުންނާމެދު އެމަނިކުފާނުފަޚުރުވެރިވާ ކަމަށް ވެސް ވަނީ ވިދާޅުވެފައެވެ.

އެމްޑީ ވިދާޅުވީ ޝައްކެއްނެތް ގޮތުގައި އެކިއެކި ގޮންޖެހުންތަކާ ކުރިމަތިލައްވައިގެން ކާމިޔާބީގެ ހަރުފަތްތައް ގިރާކުރައްވަމުން އަލިމަސް ޔޫބީލްއާ ހަމައަށް ވާސިލުވުމުގައި މި ސިނާއަތުގައި އެކި ދުވަސްވަރު މަސައްކަތްކޮށްދެއްވާފައިވާ ބޭފުޅުން ގައުމާއި ރައްޔިތުންގެ ކުރިއެރުމަށް ކޮށްދެއްވި ހިދުމަތްތަކަށް ޝުކުރުވެިވާ ކަމަށެވެ.

"އަދި މިހާރު ތިއްބެވި ބޭފުޅުން މެދުކެނޑުމެއް، ފޫހިކަމެއް އަދި ވަރުބަލިކަމެއްނެތި ކޮށްދެއްވަމުންގެންދަވާ އަގުހުރި ޚިދުމަތްތަކަށް އިޚްލާޞްތެރިކަމާއެކު ޝުކުރު ދަންނަވަން."

ހަމަމިއާއެކު ރައީސް ޑރ. މުޙައްމަދު މުއިއްޒުގެ ވެރިކަމުގައި މި ސިނާއަތުގެ ކުރިމަގު އޮތީ ވަރަށް ވެސް އުޖާލާކޮށްކަން ވަނީ ފާހަގަކުރައްވާފައެވެ. އަދި މި ދެމުންގެންދާ ގައުމީ ހިދުމަތުގައި މާތްﷲ ބަރަކާތްލައްވައި، އިތުރު ފާގަތިކަން މިންވަރުކުރެއްވުމަށް ވަނީ ދުޢާ ދަންނަވާފައެވެ.