ހައުސިންގ މިނިސްޓްރީގެ އިސްމަގާމުތަކުގައި ތިބި 9 މީހަކު ސަސްޕެންޑުކޮށްފިއެވެ.

އެގޮތުން ޑެޕިއުޓީ މިނިސްޓަރުންނާއި ސީނިއަރ ޕޮލިޓިކަލް ޑިރެކްޓަރުން ސަސްޕެންޑުކޮށްފައިވާކަމަށް ވަނީ މައުލޫމާތު ލިބިފައެވެ.

މި މުވައްޒަފުން މަގާމުން ވަކިކުރި ސީދާ ސަބަަބެއް ނޭނގުނުނަމަވެސް، އެ ފަރާތްތައް މަގާމުން ވަކިކޮށްފައި މިވަނީ "ބިންވެރިޔާ" ސްކީމްގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް އެޗްޑީސީން ހުޅުމާލެއިން ގޯތި ދިން މައްސަލައިގެ ޖިނާއީ ތަހުގީގެއް ކުރަމުންއަންނަ ދަނޑިވަޅެއްގައެވެ.

މި މައްސަލައިގައި ޑޮކިއުމަންޓް ފޯޖުކުރިކަމުގެ ތުހުމަތުތަކެއް ކުރަމުން އަންނައިރު، ދިވެހި ފުލުހުންގެ ހިދުމަތުން ޑިސެމްބަރ 19 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ސެންޓްރަލް އިންވެސްޓިގޭޝަން ކޮމާންޑުގެ ވެރިޔާ، އޭސީޕީ ޢަބްދުﷲ ޝަރީފް ވިދާޅުވީ ޕްރޮސެކިއުޓަރ ޖެނެރަލްގެ އޮފީހުން ވަނީ "ބިންވެރިޔާ" އަދި "ގެދޮރުވެރިޔާ" ސްކީމްތަކުގައި މަގާމުގެ ނުފޫޒު ބޭނުންކޮށްގެން އެއްވެސް ކަމެއް ހިންގާފައިވޭތޯ ބެލުމަށް ފުލުހުންނާއި އޭސީސީއަށް އަމުރުކޮށްފައި ކަމަށެވެ.

މި މައްސަލައާ ގުޅިގެން އެޗްޑީސީގެ ބޯޑުގެ ޗެއަރމަން ފިޔަވައި އެހެން ހުރިހައި މެމްބަރުން ވެސް ސަސްޕެންޑުކޮށްފައިވާއިރު، އޭގެތެރޭގައި މެނޭޖިންގ ޑިރެކްޓަރ ފަޒުލް ރަޝީދު ވެސް ހިމެނެއެވެ. އަދި އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ފަޒީލް ރަޝީދު ވެސް ވަނީ ހުރިހައި ޒިންމާތަކަކުން ވަކިކޮށް ސަސްޕެންޑް ކުރެވިފައެވެ.