އެމްޑަބްލިއުއެސްސީ ސްޓާފް އެވޯޑު ނައިޓް ބާއްވައިފިއެވެ.

ޑިސެމްބަރ 19 ވަނަ ދުވަހުގެ ރޭ ސަލާހުއްދީން ސްކޫލުގައި ބޭއްވި މި ހަފުލާ ޝަރަފްވެރިކޮށްދެއްވާފައިވަނީ އެ ކުންފުނީގެ ޗެއަރޕާރސަން ޝަމްހޫޒާ އަޙްމަދުއެވެ.

މި ހަފުލާގައި އެ ކުންފުނިން ދޭ އެންެމެ ހާއްސަ އެވޯޑުކަމަށްވާ 'ޗެއަރމަންސް އެވޯޑް ފޯ އެކްސެލެންސް' ލިބުނީ އެސިސްޓަންޓް ޖެނެރަލް މެނޭޖަރު އިންފޮމޭޝަން ސިސްޓަމްސް އާސިފް މުހައްމަދަށެވެ. އޭނާ އަށް އެވޯޑް ހަވާލުކޮށްދެއްވީ ޝަމްހޫޒާ އަހްމަދުއެވެ.

މިއީ ކުންފުނީގެ ކުރިއެރުމަށާއި ތަރައްގީއަށް ފާހަގަކުރެވޭ، އަގުހުރި، އިހުލާސްތެރި ހިދުމަތްތަކެއް ކޮށްދިނުމާއި ކުންފުނީގެ ތަސައްވަރު ކުރިއެރުވުމަށްޓަކައި ކެނޑިނޭޅި މަސައްކަތް ކޮށްދެއްވާފައިވާ ފަރާތަކަށް ދޭ އެވޯޑެކެވެ. އަދި ރޭގެ ހަފުލާގައި ވަނީ އެ ކުންފުންޏަށް ދިގު މުއްދަތެއްގައި ހިދުމަތް ކުރި މުވައްޒަފުންނަށާއި އެންމެ ރަނގަޅަށް މަސައްކަތްކުރި މުވައްޒަފުންގެ އަގުވަޒަންކޮށް އެވޯޑް ދީފައެވެ.

އެގޮތުން ތަފާތު 12 ކެޓަގަރީއަކުން 36 މުވައްޒަފަކަށް ވަނީ އެވޯޑް ދީފައެވެ. އަދި އެ ކުންފުންޏަށް ދިގު މުއްދަތަކަށް ހިދުމަތް ކޮށްފައިވާ 83 މުވައްޒަފަކަށް ވެސް އެ ފަރާތްތަކުގެ އަގުވަޒަންކުރުމުގެ ގޮތުން ވަނީ އެވޯޑް ދީފައެވެ.

އެމްޑަބްލިޔުއެސްސީގެ މެނޭޖިންގ ޑިރެކްޓަރ އަބްދުލް މަތީން ވިދާޅުވީ، އެ ހަފުލާގެ މައިގަނޑު މަގުސަދަކީ ކުންފުނީގެ މުވައްޒަފުންގެ ހުނަރު ފާހަގަކުރުމާއެކު މުވައްޒަފުން ކުންފުންޏަށް ކޮށްދޭ ބުރަ މަސައްކަތުގެ އަގު ވަޒަންކޮށް، އެގޮތުގައި ކުރިއަށް ދިއުމުގެ ރޫހު އާލާކޮށް އެކަމަށް ހިތްވަރު ދިނުން ކަމަށެވެ.