މި ހިނގާ ޑިސެމްބަރ 12 ވަނަ ދުވަހު ހައުސިންގ މިނިސްޓްރީ ހުރި އިމާރާތުގައި ހިނގި އަލިފާނުގެ ހާދިސާ ތަހުގީގު ކުރުމުގައި ދިވެހި ފުލުހުންނަށް އެހީތެރިވުމަށް އިންޑިއާގެ ޓީމެއް ރާއްޖެ އަތުވެއްޖެއެވެ.

ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވީ ގްރީން ބިލްޑިންގ ގައި ހިނގި އަލިފާނުގެ ހާދިސާއާ ގުޅިގެން ކުރަމުންދާ ތަހުގީގުގައި އެހީތެރިވުމަށް އިންޑިއާގެ ތަޖުރިބާކާރުންގެ ހާއްސަ ޓީމެއް މިހާރު ދިވެހި ފުލުހުންނާއެކު ހަރަކާތްތެރިވަމުންދާކަމަށެވެ.

މި ހާދިސާގެ ފުރިހަމަ ތަހްގީގެއް ކުރާނެކަމަށް ދިވެހި ފުލުހުންގެ ހިދުމަތުން މީގެކުރީން ވެސް ވަނީ ވިދާޅުވެފައެވެ. އަދި ބޭރުގެ ތަހުގީގީ ޓީމާއެކު ކުރެވޭ މަސައްކަތުން ހާދިސާ ހިނގައިދިޔަ ގޮތް ދެނެގަނެވޭނެކަމުގެ ޔަގީންކަން އޮތްކަމަށް ވެސް ވިދާޅުވެފައި ވެއެވެ.

ދިވެހި ފުލުހުންގެ ހިދުމަތުން ވަނީ މި އަލިފާނުގެ ހާދިސާއާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންނާ ހިއްސާ ކުރުމަށް ވެސް އިލްތިމާސްކުރައްވާފައެވެ.

އެ ހާދިސާގައި ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރްމެންޓް މިނިސްޓްރީ ވަނީ ބޭނުން ނުކުރެވޭ ވަރަށް އަނދާފައެވެ.