މުސްލިމުން އެއްވެސް ކަމެއްގައި ޣައިރު ދީންތަކުގެ މީހުންނާ އެއްގޮތަށް އުޅެގެންނެއް ނުވާނެ ކަމުގައި ހުކުރު ހުތުބާގައި ހަނދާންކޮށްދީފިއެވެ.

"ޣައިރުދީންތަކުގެ ޝިޢާރުތައް ފާޅުކުރުން" މި މައުޟޫއަށް ތައްޔާރުކޮށްފައިވާ ހުތުބާގައި ވަނީ އެއީ އަގީދާގެ ކަމެއްކަމުގައި ވިޔަސް، އަޅުކަމުގެ ކަމެއް ކަމުގައި ވިޔަސް، އަހްލާގުގެ ކަމެއް ކަމުގައި ވިޔަސް އެގޮތަށް އުޅެގެން ނުވާނެ ކަމަށެވެ.

" އެމީހުންގެ ހާއްސަ އާދަކާދަތަކުގެ ތެރެއިން ކަމެއް ކަމުގައި ވިޔަސް އަދި އެހެން ދީންތަކުގެ ޢީދުތައް ފާހަގަކުރުމުގައި ބައިވެރިވުން ފަދަ ކަމެއްކަމުގައި ވިޔަސް، އަހުރެމެން މުސްލިމުން އެ މީހުން ކޮޕީކޮށް، ނަކަލުކޮށް، އެއްގޮތްވުމަކީ ހުއްދަވެގެންވާ ކަމެއްނޫނެވެ." 

މީގެއިތުރުން އަޅުކަމުގެ ގޮތުން ކުރެވޭ ކަންކަމުގައި އެހެން ބަޔަކު ކޮޕީކުރުމަކީ ނުވަތަ އެހެން ބަޔަކާ އެއް ގޮތަށް ޢަމަލުކުރުމަކީ އިސްލާމީ އުންމަތުގެ ޝަހްސިއްޔަތު ފުނޑުފުނޑުވެ، މި ދީނުގެ އަމިއްލަވަންތަކަން ގެއްލޭނެ ކަމެއް ކަމުގައި ވެސް ހަނދާންކޮށްދީފައި ވެއެވެ. އަދި މުސްލިމުން ކްރިސްމަސް ފާހަގަކުރުމާއި މި އިހްތިފާލުތަކުގައި ބައިވެރިވުމަކީ އިސްލާމްދީން ހުއްދަކުރާ ކަމެއްނޫން ކަމަށް ވެސް ބުނެފައި ވެއެވެ.

ހުތުބާގައި ބުނީ ހެޔޮ ލަފާ އިސްލާމީ މުޖުތަމަޢެއް ބިނާކުރެވޭނީ އިސްލާމީ ސަގާފަތު ފަތުރައިގެން ކަމަށާއި އިސްލާމީ އަގީދާއާއި އަހްލާގުގެ މަތީގައި ޢާއިލާ ބިނާކުރެވިގެން ކަމަށެވެ. އަދި އިސްލާމީ މުޖުތަމައުގެ ބިންގަލަކީ އަގީދާ ކަމަށެވެ.

ޣައިރު މުސްލިމުންގެ ޢީދުތަކާއި އެއުރެންގެ އަގީދާއާ ގުޅިފައިވާކަންކަމުގައި ބައިވެރިވުން ހަރާމްވުމަކީ، އެއުރެންނާ މެދު އިހްސާންތެރިވެ، ޢަދުލުވެރި ނުވާންވީ ސަބަބެއް ނޫން ކަމަށާއި ދިނާއި އަގީދާއާ ގުޅުން ހުރި ކަންކަމަކީ ވަކި މައްސަލައެއްކަން ހުތުބާގައި ވަނީ ފާހަގަކޮށްފައެވެ.