ރާއްޖޭގެ މޫސުން ވަރަށް ގޯސްވުމާއެކު ކަނޑުދަތުރުތަކަށް ސަމާލުވުމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސްކުރައްވައިފިއެވެ.

އެ އިދާރާ އިން ވަނީ މިއީ ވައިގަދަ، ކަނޑުގަދަ ދުވަސްވަރެއް ކަމަށްވުމާއެކު، ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކުރައްވާފައެވެ. އަދި ގަދަވައިގައި އެއްލާލަފާނެ ތަކެތި ހާއްސަކޮށް ގޭގޭގެ ފުރާޅާއި ގަސްމުށިފަދަ ތަކެތި ރައްކާތެރިކޮށް ބަންދުކުރުމަށް ވަނީ އެދިލައްވާފައެވެ.

މީގެއިތުރުން ކަނޑުދަތުރުކުރާ ފަރާތްތަކުން މޫސުމަށް ސަމާލުކަމެއްދީ، މޫސުމީ އަދާހަމަ ހޯދުމަށް ވެސް އެދިލައްވައެވެ.

ރާއްޖޭގެ މޫސުމާއިބެހޭ ގައުމީ އިދާރާ އިން ވެސް މިހާރުގެންދަވަނީ ހުދު އަދި ރީނދޫ ސަމާލުތައް ރާއްޖޭގެ އެކި ސަރަހައްދަށް ނެރެމުންނެވެ. އަދި ގަޑިއަކު 25 އާއި 30 މޭލުގެ ބާރުމިނުގައި ވައި ޖެހޭނެކަމަށް ވެސް ލަފާކޮށްފައި ވެއެވެ.

މީގެއިތުރުން ރާއްޖޭގެ ކަނޑުތައް ވެސް ގަދަވާނެކަމަށާއި ކުރިއަށް އޮތް ހަފްތާ ބަންދުގައި ރާއްޖޭގެ ހުރިހައި ސަރަހައްދަކަށް ވެސް މޫސުން ގޯސްވާނެކަމަށް ލަފާކޮށްފައި ވެއެވެ.

މިއީ ރާއްޖެއަށް ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރު ކަމަށާއި މިފަދަ ދުވަސްވަރު ކޮޅިގަނޑު އުފެދުމުގެ ފުރުސަތު ބޮޑުކަމަށް މޫސުމާއިބެހޭ ގައުމީ އިދާރާ އިން ވަނީ ވިދާޅުވެފައެވެ.