ލާމަރުކަޒީ ނިޒާމަކީ ރައްޔިތުންނާ ގާތުން، ރައްޔިތުން އެދޭ ގޮތަށް ވެރިކަންކުރުމުގެ ނިޒާމު ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ ކަންގަތި އެވޯޑް ދިނުމަށް އެލްޖީއޭގެ ފަރާތުން "މީރުމާ" ގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ކައުންސިލްތައް ރޭންކުކޮށް، ކުރިއެރުންތައް ހޯދި ފަރާތްތަކަށް ކަންގަތި އެވޯޑް ދިނުމަށް ބޭއްވި ރަސްމިއްޔާތުގައި މިނިސްޓަރު ވިދާޅުވީ އެއީ ވެރިކަންކުރާ ރަށުން ލިބޭ ނަފާގެ އެހީއާއެކު މުނިސިޕަލް ހިދުމަތް ދިނުމަށް މަގުފަހިވާ ނިޒާމު ކަމަށް ވިދާޅުވިއެވެ. އަދި އެ ނިޒާމަކީ، ލާމަރުކަޒީ އުސޫލުން، ރައްޔިތުންނާ ގާތުން ވެރިކަންކުރުމުގެ ގާނޫނީ ބާރު ލިބިދޭ ނިޒާމު ކަމަށެވެ.

"އާދެ 2008 ވަނަ އަހަރު ތަންފީޒު ކުރަން ފެށުނު ފެހި ގާނޫނުއަސާސީގެ ހިޔަލުގައި މިއަދު ރާއްޖޭގައި މި ވަނީ ރައްޔިތުން ބައިވެރިވާ، ރައްޔިތުންގެ ބާރު ހިނގާ، ޖުމްހޫރީ އަދި މަލްޓިޕާޓީ ޑިމޮކްރަސީގެ ސިފަތަކާއި، ހަމަތައް ގަރާރުވެފައިވާ، ޔުނިޓަރީ ދައުލަތެއް ރާއްޖޭގައި ގާއިމުވެފަ."

މީގެއިތުރުން ރާއްޖޭގެ އިދާރީ ދާއިރާތައް ހިންގަމުންދަނީ ރާއްޖޭގެ ޖުމްހޫރިއްޔާގެ ގާާނޫނުއަސާސީގެ 8 ވަނަ ބާބުން ކަށަވަރުކުރާ ލާމަރުކަޒީ ނިޒާމުގެތެރެއިން ކަމަށް ވެސް ވިދާޅުވިއެވެ.

މިރަސްމިއްޔާތުގައި މިނިސްޓަރު ވަނީ ކަންގަތި އެވޯޑްތައް ހާސިލު ކުރެއްވި ހުރިހައި ކައުންސިލްތަކަށް ރައީސް ޑޮކްޓަރ މުޙައްމަދު މުޢިއްޒުގެ ނަންފުޅުގައި ތަހުނިޔާއާއި މުބާރިކުބާދު އަރިސްކުރައްވާފައެވެ.