ގޯތީގެ ވައްކަމަކީ "ރޭވިގެން ހިންގާފައިވާ ބޮޑު ޖަރީމާއެއް" ކަމަށް ދަ ޑިމޮކްރެޓްސް އިން ސިފަކޮށްފިއެވެ.

އެ ޕާޓީން ބުނީ ފޯޖުކޮށްފައިވާ ލިޔެކިޔުން ހުށަހަޅައިގެން ވަގު ގޯއްޗެއްގެ ވަށާފާރު ރާނަން އެޗްޑީސީން އެވަނީ ހުއްދަ ދީފައި ކަމަށެވެ. އަދި އެ ކުންފުނީގެ ފެނުމާ، އެނގުމުގެ ތެރެއިން އެ ގޯތީގެ ވަށާފާރު ވަނީ ރާނާފައި ކަމަށެވެ.

މީގެއިތުރުން މިކަމާއިގުޅިގެން އާންމުވެފައިވާ ލިޔެކިޔުންތަކުން އެނގޭގޮތުގައި އޮގަސްޓް މަހުގެ ތެރޭގައި އެޗްޑީސީ އަށް އެކަން އެނގިފައި އޮތްކަން ވަރަށްރަނގަޅަށް އެބަސާފުވާ ކަމަށް ވެސް ވަނީ ބުނެފައެވެ. އަދި އެޗްޑީސީން ހައުސިންގ މިނިސްޓްރީ އަށް އެކަން އަންގައި، މުއާމަލާތްތަކެއް ހިނގާފަ އޮތްކަން ވެސް އެނގެން އެބައޮތްކަމަށް ވަނީ ބުނެފައެވެ.

"ނަމަވެސް ކަމާއިބެހޭ އިދާރާއަކަށް، ތަހުގީގީ އިދާރާއަކަށް މިވަރުގެ ބޮޑު ފްރޯޑެއް ހިނގައިގެން ދިޔައިރު، އެއްވެސްގޮތަަކަށް އަންގާފައެއް ނުވޭ. އެޗްޑީސީއަކުން ވެސް އަދި ހައުސިންގ މިނިސްޓްރީއަކުން ވެސް."

އެ ޕާޓީން ބުނީ ވަގު ލިޔެކިޔުން ހުށަހެޅީ އެޗްޑީސީގެ މެނޭޖިންގ ޑިރެކްޓަރގެ ބޭބެ އެމްޑަބްލިޔުއެސްސީގެ ޑެޕިއުޓީ މެނޭޖިންގ ޑިރެކްޓަރ ކަމަށާއި އެއީ އިއްތިފާގެއް ކަަމަށް ގަބޫލު ނުކުރެވޭ ކަމަށެވެ. އަދި އެދެބޭފުޅުންގެ ކޮއްކޮ ފިޒާނާ ރަޝީދު ބިންވެރިޔާ ސްކީމްގެ ލަފާދޭ ކޮމިޓީގައި އިންނެވުމަކީ ވެސް އިއްތިފާގެއްކަން، ރާއްޖޭގައި މިހާރު ކަންހިނގަމުންދާ ގޮތުން ކުޑަކުއްޖަކު ވެސް ގަބޫލުނުކުރާނެކަަމަށް ޑިމޮކްރެޓުން ބުނެފައި ވެއެވެ.