ރާއްޖޭގައި ބާއްވާ އެންމެ އުފާވެރި، އެންމެ މަޖާ 5ކޭ ފަން ރަން އުރީދޫ އިން ބާއްވައިފިއެވެ.

ޑިސެމްބަރ 20 ވީ ހުކުރު ދުވަހު ހަވީރު ހުޅުމާލޭގައި ބޭއްވި މި ދުވުމުގައި 6500 އަށްވުރެ ގިނަ ދުވުންތެރިން ވަނީ ބައިވެރިވެފައެވެ.

މުޖުތަމައުއާއި ފިޓްނަސް އަދި މަޖާ، އުފާވެރި މާހައުލެއްގައި ބޭއްވި މި ދުވުމުގެ ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގެންނެވީ ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފްއެވެ.

ވިއްސާރަ ދުވަހެއް ނަމަވެސް ދުވުމުގެ ބައިވެރިންގެ ޖޯޝަކަށް، ފޯރިއަކަށް ބަދަލެއް ނާންނައިރު، މި ހަރަކާތުގައި ހުޅުމާލެ އަކީ ކުލައާއި ފޯމާއި އުފާވެރިކަމުގެ ކާނިވަލަކަށް ވަނީ ބަދަލުވެގެން ގޮސްފައެވެ. މި ދުވުމުގައި ކޮންމެ ކިލޯމީޓަރެއް ނިމޭ ހިސާބުގައި މަޖާ ހަރަކާތަކާއެކު ފޯމް ސްޓޭޝަންތަކާއި ކުލަ ޖެހުން އަދި އޮބްސްޓެކަލް ޗެލެންޖުތައް ކުރިއަށްދިޔައިރު، މި ދުވުމުގައި ބައިވެރިވި ހުރިހައި އުމުރުފުރައެއްގެ މީހުން ވެސް ވަނީ ދުވުން ފުރިހަމަކޮށްފައެވެ.

މި ހަރަކާތުން ދައްކުވައިދެނީ ދުޅަހެޔޮ ދިރިއުޅުމެއް އަށަގެންނެވުމަށާއި ރާއްޖޭގެ އެކި ކަންކޮޅުތަކުގައި ދިރިއުޅޭ އާއިލާތަކަށާއި ފަރުދުންނަށް ހަނދާން ނައްތާނުލެވޭ ފަދަ ވަގުތުތަކެއް އުފެއްދުމަށް އުރީދޫއިން ކުރަމުން އަންނަ މަސައްކަތްތަކެވެ.

އުރީދޫ މޯލްޑިވްސްގެ ޗީފް އެގްޒެކެޓިވް އޮފިސަރު ޚާލިދު އަލް ހަމާދީ ވިދާޅުވެފައިވަނީ މުޖުތަމައުގެ ފަރާތުން މިހާ ބޮޑު ބައިވެރިވުމަކާއި ހިތްވަރެއް ފެނުމުން ވަރަށް އުފާވާ ކަަމަށެވެ. އަދި ފަން ރަން އަކީ ހަމައެކަނި ދުވުމަކަށް ވުރެ މާ ބޮޑު ދުވުމެއް ކަަމަށާއި މިއީ އުފާވެރިކަމާއި އެކުވެރިކަމާއި ހަރަކާތްތެރި ދިރިއުޅުމުގެ އުފަލެއް ކަމަށް ވެސް ވިދާޅުވިއެވެ.