ސުވާލު އުފެދިފައިވާ ޑޮކިއުމެންޓްގެ ރަނގަޅު ފޮރެންސިކް ތަހުގީގެއް ހެދުމަށްފަހު އޭގެ ރިޕޯޓް ހާމަކުރަން ފުލުހުންނަށް ނުކުރޭނެ ކަމަށް ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން ބުނެފިއެވެ.

ޑިސެމްބަރ 21 ވަނަ ދުވަހު އެޕާޓީން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ލީގަލް އެފެއާސްގެ ކުރީގެ އަންޑަ ސެކްރެޓަރީ އަޙްމަދު މައުރޫފް ވިދާޅުވީ ބިންވެރިޔާ ސްކީމުން ނުހައްގުން ގޯތި ދީފައިވާ ކަމަށް ތުހުމަތު ކުރެވޭ މައްސަލައިގައި ފުލުހުން ޢަމަލުކުރި ގޮތުން ފެންނަނީ ސިޔާސީވެފައިވާ މަންޒަރު ކަމަށެވެ.

އެ މައްސަލައިގެ އިންސާފުވެރި ތަހުގީގެއް ހިންގާނެ ކަމަށް ގަބޫލުނުކުރެވޭކަން ހާމަކުރައްވައި އޭނާ ވިދާޅުވީ ކުށެއްގެ ތުހުމަތުގައި ގެންދާ މީހަކު ދޮގު ވެސް ހަދައިފާނެ ކަމަށެވެ. އަދި އެއީ ހަގީގަތެއް ކަމަށް ދެކިގެން ފުލުހުން އާންމުންގެ ތެރޭގައި އެ ވާހަކަ ދެއްކުން ވަނީ ކުށްވެރިކުރައްވާފައެވެ.

މީގެ އިތުރުން އެ މައްސަލައިގައި އަކްރަމަށް ކުރާ ތުހުމަތުތަކަށް އިޝާރާތް ކުރައްވައި، މައުރޫފު ވަނީ އަކްރަމާ ސުވާލުކޮށްފައިނުވާ ކަމަށާއި އަކްރަމް ހާޟިރުކުރި ނަމަ، އޭނާ ވެސް ދައްކަވާ ވާހަކައެއް ފުލުހުން އެގޮތަށް އާންމުންނާ ހިއްސާކުރާނެ ކަމާމެދު މިހާރުސުވާލު އުފެދޭ ކަމަށެވެ.

ތަހުގީގުގައި މީހަކު ބުނާހާ އެއްޗެއް މިހާތަނަށް ފުލުހުން ހާމަކޮށްފައި ނުވޭ. ކަނޑައެޅިގެން ފޯޖުކޮށްގެން ރަސްމީ ލިޔުމެއް ކަމަށް ދައްކަން އަމިއްލައަށް ލިޔުމެއް ހުށަހަޅައިގެން ގޯއްޗެއް ހޯދި މީހަކު ދޭ މައުލޫމާތަކީ ރަނގަޅު މައުލޫމާތު ކަމަށް ބަލައިގެން އެ މައުލޫމާތު ފުލުހުން ހާމަކުރުމަކީ… pic.twitter.com/sTwweGQdNu

— MDP Secretariat (@MDPSecretariat) December 21, 2024

މައުރޫފް އިތުރަށް ވިދާޅުވީ މި ޒަމާނުގައި ޑޮކިއުމެންޓަކާ ގުޅޭ މައްސަލައެއް ބަލާއިރު، ޝާމިލުވާ މީހުންނާ ސުވާލުކުރުމުގެ ބަދަލުގައި ޢަމަލުކުރާ ގޮތަކީ ޑޮކިއުމެންޓްގެ ސައްހަކަން ކަށަވަރު ކުރުން ކަމަށެވެ. އަދި އެކަން ކުރާނޭ ގޮތްތައް ފުލުހުންނަށް އެނގޭނެ ކަމަށް ވެސް ވިދާޅުވިއެވެ.