ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަވަށްޓެރި އިންޑިއާ އަށް ވަޑައިގަތުމަށް ހަމަޖެހިއްޖެއެވެ.

މަޖިލިސް އިދާރާ އިން 'އޮއިވަރު' އަށް މައުލޫމާތު ދެއްވަމުން ވިދާޅުވީ މި ދަތުރުފުޅު ކުރެއްވުމަށް ހަމަޖެހިފައިވަނީ އަންނައަހަރުގެ ފެބްރުއަރީ މަހު ކަމަށެވެ. އަދި މިއީ އެގައުމުގެ ގާނޫނު ހަދާ މަޖިލީހުގެ ތިރީގެ ކަމަށްވާ ލޮކްސަބާ ރައީސްގެ ދައުވަތަކަށް ކުރައްވާ ރަސްމީ ދަތުރުފުޅެއް ކަމަށެވެ.

މަޖިލިސް ރައީސް އިންޑިއާ އަށް ވަޑައިގަންނަވާކަން އެގައުމުގެ އެކްސްޓަން އެފެއާޒްގެ ސްޓޭޓް މިނިސްޓަރު ޕަބިތުރާ މާގަރީޓާ ވެސް ވަނީ ހާމަކުރައްވާފައެވެ. އެއީ އިންޑިއާއިން އަވަށްޓެރި ގައުމުތަކަށް އިސްކަން ދިނުމަށް ގެންގުޅޭ 'ނެއިބަހުޑް ފަސްޓް' ސިޔާސަތުގެ ދަށުން އެހެން ގައުމުތަކުގެ ގާނޫނު ހަދާ މަޖިލިސްތަކާ ކުރާ މުއާމަލާތްތަކާ ގުޅޭ ގޮތުން ލޮކް ސަބާއިން ސުވާލުކުރުމުން، އެ ސުވާލަށް މިނިސްޓްރީން ފޮނުވި ޖަވާބުގައެވެ.

މިއީ މަޖިލީހުގެ ރައީސްކަމާ ހަވާލުވެވަޑައިގަތް ފަހުން އަބްދުއްރަހީމް އިންޑިއާއަށް ކުރައްވާ ފުރަތަމަ ދަތުރުފުޅުނަމަވެސް، ރާއްޖެއިން އަންނަނީ އިންޑިއާގެ ގާނޫނު ހަދާ މަޖިލީހާ ދެމެދު އަބަދުވެސް ވަރަށް ގާތްގުޅުމެއް ބާއްވަމުންނެވެ.