މިހާރު ކުރަމުންދާ ވިއްސާރައިގައި މާލޭ ސިޓީގެ މަގުތަކުގައި ފެންބޮޑުވުމުގެ ސަބަބުން ފެންހިންދުމާއި، ވެލިބަސްތާ ޖެހުމުގައި ސިފައިން އެހީތެރިކަން ފޯރުކޮށްދީފިއެވެ.

އެގޮތުން އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ބެލުމުގެ ދަށުން ސިފައިން ވަނީ ރޭ ދަންވަރު 2:30 އިން ފެށިގެން ފެން ހިންދުމުގެ މަސައްކަތްފަށާފައެވެ. އަދި މާލޭގެ 6 ސަރަހައްދެއްގައި ޖުމްލަ 18 ޕަންޕު ބޭނުންކޮށްގެން ހުއްޓުމެއްނެތި ފެން ހިންދުމުގެ މަސައްކަތްކޮށް މިއަދު މެންދުރުފަހު 1:35 ހާއިރު ވަނީ މާލޭގެ މަގުތައް އާންމު ހާލަތަށް ގެނެސް ދީފައެވެ.

މީގެއިތުރުން މާލޭގެ މަގުތަކުގައި ފެންބޮޑުވެ، ބައެއް އިމާރާތްތަކަށް ފެންވަންނަކަމުގެ މައުލޫމާތު ލިބުމުން، އެ ފަރާތްތަކަށް ވެސް ވަނީ އެހީތެރިކަން ފޯރުކޮށްދީފައެވެ. އެގޮތުން އެމްއެންޑީއެފް މާލޭ އޭރިއާ ކޮމާންޑްގެ ބެލުމުގެ ދަށުން ސިފައިން ކުރި މަސައްކަތުން 67 ގެއެއްގައި 304 ވެލިބަސްތާ ވަނީ ޖަހާދީފައެވެ.