ރާއްޖޭގައި ފުޅާދާއިރާއެއްގައި ހަށިވިއްކަމުންދިޔަ ބިދޭސީންތަކެއް އަނެއްކާ ވެސް އަތުލައިގަނެފިއެވެ.

މޯލްޑިވްސް އިމިގްރޭޝަނުން ވިދާޅުވީ މި މީހުން އަތުލައިގަތީ ފުޅާދާއިރާއެއްގައި ހަށިވިއްކުމުގެ މަސައްކަތް ކުރަމުންދާ ބިދޭސީން ހޯދުމަށް ކުރަމުންދާ މަސައްކަތުގެ ދަށުން ކުރިއަށްގެންދިޔަ އިންސްޕެކްޝަންގައި ކަމަށެވެ.

އެގޮތުން މި އޮޕްރޭޝަންގައި ބިދޭސީ 7 އަންހެނުންނާއި، އޭޖެންޓުންގެ ގޮތުގައި މަސައްކަތް ކުރަމުންދިޔަ 2 ފިރިހެނަކު އެ އިދާރާގެ ބެލުމުގެ ދަށަށް ގެންގޮސްފައިވާކަމަށް ވަނީ ވިދާޅުވެފައެވެ. އަދި މިމައްސަލަ ތަހުގީގުކުރުމަށްފަހު، މީގެތެރެއިން 3 އަންހެނަކު އަނބުރާ ރާއްޖެ ނާދެވޭގޮތަށް ޑީޕޯޓުކޮށްލާފައިވާކަމަށް ވިދާޅުވެފައި ވެއެވެ.

މީގެއިތުރުން ދެންތިބި 6 ބިދޭސީން ޑީޕޯޓުކުރުމުގެ މަސައްކަތް ކުރަމުންދާކަމަށް ވަނީ ވިދާޅުވެފައެވެ. އެމީހުންގެ ތެރޭގައި ބަންގްލަދޭޝް، ވިއެޓްނާމް އަދި ޔުގާންޑާއަށް ނިސްބަތްވާ ބިދޭސީން ހިމެނެއެވެ. 

އިމިގްރޭޝަނުން ކުރިއަށްގެންދާ މި އޮޕަރޭޝަންގައި އަތުލައިގަންނަ މިފަދަ ބިދޭސީން މީގެކުރިންވެސް ވަނީ ޑީޕޯޓުކޮށްފައެވެ.