ރާއްޖެއަންނަ ފްލައިޓުތަކުގެ އަދަދު އިތުރުވެއްޖެކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރިޕޯޓަކުން ދައްކައިފިއެވެ.

މަރުކަޒީ ބޭންކުން އާންމުކުރި މަންތްލީ ސްޓެޓިސްޓިކް ރިޕޯޓްގައިވާގޮތުން މިއަހަރުގެ ފުރަތަމަ 4 މަސްދުވަހު ރާއްޖެއަށް ދަތުރުކުރި ބައިނަލްއަޤްވާމީ އެއަރލައިންތަކުގެ އަދަދު ވަނީ އިތުރުވެފައެވެ.

އެގޮތުން ފައިބެއަހަރުގެ ފުރަތަމަ 4 މަސްދުވަހާ އަޅާބަލާއިރު، ފައިބެއަހަރުގެ މި މުއްދަތުގައި ޝެޑިއުލް ފްލައިޓް މޫމަންޓްސް އުޅުނީ 5841 ގައެވެ. އެހެންނަމަވެސް މިއަހަރުގެ ފުރަތަމަ 4 މަސްދުވަހު ޝެޑިއުލްކޮށްގެން ވެލާނާ އިންޓަރނޭޝަނަލް އެއަރޕޯޓަށް ދަތުރުކޮށްފައިވަނީ 5982 ދަތުރެވެ.

މިއަހަރުގެ މި މުއްދަތުގައި ޖެނެރަލް ފްލައިޓް މޫމަންޓްސް ހުރީ 604 ގައި ކަމަށް އެ ރިޕޯޓުން ދައްކައެވެ.

މީގެއިތުރުން މިއަހަރުގެ ފުރަތަމަ 4 މަސްދުވަހު ރާއްޖެއަށް އައި ފަތުރުވެރިންގެ އަދަދު ވެސް، ފައިބެއަހަރުގެ މި މުއްދަތާއި އަޅާބަލާއިރު އިތުރުވެފައިވާ ކަމަށް ދައްކައެވެ. މިއަހަރުގެ މި މުއްދަތުގައި ރާއްޖެއަށް 7 ލައްކައަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.