މޯލްޑިވްސް ސޮސައިޓީ ފޯރ ޕާރފޯމިން އާޓްސް (އެމްއެސްޕީއޭ) ފިލްމު ފެސްޓިވަލް މިރޭ ފަށާނެއެވެ.

މި ފެސްޓިވަލު ޑިސެމްބަރ 22 ން 28 ގެ ނިޔަަލަށް އޮލިމްޕަސް ސިނަމާގައި ބާއްވާއިރު، ފެސްޓިވަލް ފަށާނީ މިރޭ 8:15 ގައި '40 ޕްލަސް' އިންނެވެ. އަދި 11:30 ގައި ދައްކާނީ 'ކަޅަކި' އެވެ.

ނެޝަނަލް ސެންޓަރ ފޮ ދި އާޓްސް (އެންސީއޭ) އާއި ގުޅިގެން ކުރިއަށްގެންދާ މި ފެސްޓިވަލުގައި ޑިސެމްބަރ 23 ވަނަ ދުވަހުން ފެށިގެން 27 ވަނަ ދުވަހާއި ހަމައަށް ކޮންމެދުވަހަކު ތިން ފިލްމު ދެއްކުމަށް ނިންމާފައިވާއިރު، 28 ވަނަ ދުވަހު ދައްކާނީ ދެ ފިލްމެވެ.

މިއީ ރާއްޖޭގައި އުފައްދާ ދިވެހި ފިލްމުތަކުގައި މަސައްކަތްކުރާ ފަރާތްތަކަށާއި ފިލްމު އުފައްދާ ފަރާތްތަކަށް ހިތްވަރުދިނުމުގެ މަގްސަދުގައި ދޭ އެވޯޑެކެވެ. އަދި އެ ފަރާތްތައް ކުރިއެރުވުމާއި އެ ފަރާތްތަކުން ކުރާ މަސައްކަތްތަކުގެ އަގު ވަޒަންކުރުމަކީ ވެސް މަގްސަދެކެވެ.

މީގެއިތުރުން ވާދަވެރި މާހައުލެއްގައި މޮޅު އުފެއްދުންތަކެއް އުފެއްދުމަށް ހިތްވަރު ދިނުމަކީ ވެސް މި ފެސްޓިވަލް ބޭއްވުމުގެ މަގްސަދެކެވެ.

މި އެވޯޑުގައި 2018 ވަނަ އަހަރުގެ ޖެނުއަރީން ފެށިގެން ފައިބެއަހަރުގެ ޑިސެމްބަރު މަހުގެ ނިޔަލަށް ދައްކާފައިވާ ފީޗަރ ފިލްމުތައް ބައިވެރިކުރުމުގެ ފުރުސަތު ވަނީ ދީފައެވެ. ޖުމްލަ 29 ކެޓަގަރީއަކުން މި އެވޯޑަށް ކުރިމަތިލުމަށް ހުޅުވައިލިއިރު، މި އެވޯޑު ހަފްލާ ބާއްވާނީ ފެސްޓިވަލަކާއެކުގައެވެ.

މި ފެސްޓިވަލަށް ވަނުމުގެ ޓިކެޓު ވެސް ވިއްކަމުން އަންނައިރު، ސީޒަން ޓިކެޓެއްގެ އަގަކީ 500 ރުފިޔާ އެވެ. އަދި ކޮންމެ ޝޯވއަކަށް ވަކިން ޓިކެޓު ނަގާނަމަ، ޓިކެޓެއްގެ އަގަކީ 50 ރުފިޔާ ކަމަށެވެ. އަދި ޓިކެޓު ގަތުމަށް ބޭނުންވާ ފަރާތްތަކުން 7645088 އަށް ގުޅުމަށް ވަނީ އެދިފައެވެ.

ހަމަމިއާއެކު ކޮންމެ ދުވަހެއްގެ ހަވީރު 4 ން ރޭގަނޑު 10 ޖަހަންދެން އޮލިމްޕަހުގެ ކައުންޓަރުން ވެސް ޓިކެޓޫ ގަންނަން ލިބޭނެއެވެ.