މޯލްޑިވްސް އިމިގްރޭޝަންގެ ހާއްސަ އޮޕަރޭޝަނެއް ހުޅުމާލޭ ދެވަނަ ފިޔަވަހީގެ ހިޔާ ފްލެޓުތަކުގައި ހިންގައިފިއެވެ.

އެ އިދާރާ އިން ވިދާޅުވީ ހުޅުމާލޭ ފޭސް 2ގެ ހިޔާ ފުލެޓުތަކުގައި ހިންގަމުންދާ ވިޔަފާރިތަކަށް ހާއްސަކޮށް ޑިސެމްބަރ 21 ވަނަަ ދުވަހު ވަނީ ރެއިޑު އޮޕަރޭޝަނެއް ހިންގާފައި ކަމަށެވެ.

އެގޮތުން 08 ފިހާރަ، 04 ކެފޭ/ ރެސްޓޯރަންޓު/ ބޭކަރީ އަދި 01 ސެލޫން ބަލައި ފާސްކޮށްފައިވާ ކަަމަށް ވިދާޅުވިއެވެ. އަދި މީގެތެރެއިން ދެ ތަނެއްގައި ގަވާއިދާ ހިލާފަށް މަސައްކަތް ކުރަމުންދިއަ ތިން މީހަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް ވެސް ވިދާޅުވެއެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް މޯލްޑިވްސް އިމިގްރޭޝަނުން ހާއްސަ އޮޕަރޭޝަންތަކެއް ގެންދަނީ ހިންގަމުންނެވެ. މި އޮޕަރޭޝަންތަކުގައި މިހައިތަނަށް 5000 އަށްވުރެ ގިނަ ބިދޭސީން ވަނީ އަނބުރާ ގައުމަށް ފޮނުވާލާފައެވެ.

ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަކީ ސަރުކާރުން ހާއްސަ އިސްކަމެއް ދެއްވައިގެން ކުރިއަށްގެންދާ މަސައްކަތެކެވެ. އެ މަސައްކަތުގެ ދަށުން މާލޭގައާއި މީހުން ދިރިއުޅޭ ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތް ވެސް ދަނީ ކުރަމުންނެވެ. އަދި އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަށް ކާބޯތަކެތި ތައްޔާރުކުރާ ތަންތަން ބަލައި، ފާސްކުރުމަށް ވެސް ހާއްސަ އޮޕަރޭޝަނެއް ފަށައިގެން ކުރިއަށް ގެންދެއެވެ.