ގައުމީ ފެތުމުގެ މުބާރާތް ނިމި ވަނަތަކަށް ދިޔަ ފެތުންތެރިންނަށާއި ކުލަބުތަކަށް ތައްޓާއި އިނާމު ހަވާލުކޮށްފިއެވެ.

ސްވިމިންގ އެސޯސިއޭޝަން އޮފް މޯލްޑިވްސް އިން އިންތިޒާމުކޮށްގެން ބޭއްވި މި މުބާރާތުގެ އޯޕަން ކެޓަގަރީގެ އަންހެން ޗެމްޕިއަންކަން ހޯދީ ޒުވާން އުއްމީދީ ފެތުންތެރިޔާ ހަމްނާ އަހްމަދުއެވެ. އޭނާ ޗެމްޕިއަންކަން ހޯދީ 100 ޕޮއިންޓާއެކުގައެވެ.

އަންހެން ބައިގެ ދެވަނަ ޒައިނަބް އަބްދުﷲ ޝަފީގު 90 ޕޮއިންޓާއެކު ހޯދިއިރު، މެރާލް އައިން ލަތީފަށް ތިންވަނަ ލިބުނީ 80 ޕޮއިންޓާއެކުގައެވެ.

ފިރިހެން އޯޕަން ކެޓަގަރީގެ ޗެމްޕިއަންކަން މުހައްމަދު ރިހާން ޝިހާމް އަށް 105 ޕޮއިންޓު ލިބުނުއިރު، އަލީ އިމްއާން ދެވަނަ ހޯދީ 95 ޕޮއިންޓު ލިބިގެންނެބެ. އަދި ތިންވަނަ ހޯދި ދާއިން އަހުމަދު ޝަފީގަށް 85 ޕޮއިންޓު ވަނީ ލިބިފައެވެ.

މި މުބާރާތުގެ ޓީމު އިވެންޓުގެ ފިރިހެން ގިންތީގެ އެއްވަނަ ޓީމަކަށް 330 ޕޮއިންޓާއެކު ފީނާ ސްވިމިންގ އެކަޑަމީ ހޯދިއިރު، 200 ޕޮއިންޓާއެކު ދެވަަނަ ހޯދީ ނިއު ލެގޫން ސްވިމިންގ ކުލަބެވެ. އަދި ތިންވަނަ ހޯދި މޯލްޑިވްސް ލައިފްގާޑް އެސޯސިއޭޝަނެވެ. އެޓީމަށް ލިބުނީ 100 ޕޮއިންޓެވެ.

އަންހެން ގިންތީގެ އެއްވަނަ ޓީމަކަށް ހޮވުނީ ޑީއެޗްއައި ސްޕޯޓްސް ކްލަބެވެ. 305 ޕޮއިންޓް އެޓީމަށް ލިބިފައިވާއިރު، ދެވަނައަށް ދިޔަ މޯލްޑިވްސް ލައިފްގާޑް އެސޯސިއޭޝަނަށް ލިބުނީ 210 ޕޮއިންޓެވެ. އަދި ނިއުލެގޫން ސްވިމިންގ ކުލަބު ތިންވަނަ ހޯދީ 115 ޕޮއިންޓާއެކުގައެވެ.

މީގެއިތުރުން މުބާރާތުގެ ޖޫނިއަރ ކެޓަގަރީގެ ފިރިހެން އެއްވަނަ ޒުކައިން އަބްދުﷲ ހަނީފް އަށް ލިބުނުއިރު، ދެވަނަ ލިބުނީ އައިމަން މޫސާ ރަޝީދުއަށެވެ. މިބައިގެ އަންހެން ބައިން އެއްވަނަ އަމްނާ ތަޒްކިޔާ މިރްސާދު ހޯދިއިރު، ދެވަނަ ހޯދާފައިވަނީ ލައިލީ އަހުމަދު ނަވާޒް، ޒޯހާ އަޒްލީ ނަޒީމް އަދި ސާރާ މުހައްމަދެވެ.