ރާއްޖެއަށް މަސައްކަތް ކުރުމަށް ގެނައި ބިދޭސީންތަކެއް ހާލުގައި ޖެހިފައިވާ މައްސަލައެއް ފެންމަތިވެއްޖެއެވެ.

މި މައްސަލަ ފެންމަތިވެފައިވަނީ އިންޑިއާގެ ނޫހެއްގައި ޝާއިއުކޮށްފައިވާ ވީޑިއޯއަކާއި ގުޅިގެންނެވެ. އެ ވީޑިިއޯގައި ބުނެފައިވާގޮތުގައި ކޮންސްޓްރަކްޝަން މަސައްކަތަކަށް އެ ގައުމުން ރާއްޖެ ގެނައި 40 މީހަކު ވަނީ ހާލުގައި ޖެހިފައެވެ.

އާންމުވެފައިވާ ވީޑިއޯގައި މަނޯޖް ޕްރަދާން ނަމަކަށް ކިޔާ މީހަކު ބުނެފައިވަނީ އެމީހުން ރާއްޖެ ގެނައި ކުންފުނިން، އެ މީހުންނަށް ވަރަށް އިހާނެތިކޮށް ކަންކަން ކުރަމުން އަންނަކަމަށެވެ. އަދި އެއީ ރެނާޓަސް ކުންފުނީގެ މަސައްކަތަކަށް ކަމަށް ބުނެފައި ވެއެވެ.

އެހެންކަމުން އެ މީހުން ސަލާމަތްކޮށްދިނުމަށް އިންޑިއާ ސަރުކާރުގެ ކިބައިންނާއި އެހެން ފަރާތްތަކުގެ ކިބައިން އެދި ބުނީ އެމީހުން ރާޖެ ގެނައީ އެޖެންޓެއް މެދުވެރިކޮށް، މިއަހަރުގެ ޖޫން އަދި ޖުލައި މަހު ކަމަށެވެ.

"އަހަރުމެން ގެނައިއިރު ބުނި ރަނގަޅު މުސާރައެއް ދޭނެކަަމަށް. އެކަމަކު މުސާރަ ނުދޭތާ ވަަރަށް ގިނަ މަސްވެއްޖެ."

މަނޯޖު އިތުރަށް ބުނީ މުސާރަ ނުދޭ މައްސަލައިގާ އަޑުއުފުލުމުން ކުންފުނިން އެ މީހުންނަށް ބިރު ދައްކަމުން އަންނަކަަމަށެވެ. އަދި ދިރިއުޅޭ އެކޮމޮޑޭޝަން ތެރޭގައި ބަންދުކޮށްފައިވާކަމަށެވެ. އަދި މިހާރުވަނީ އެތަނުން ކަރަންޓު ވެސް ކަނޑާލާފައި ކަމަށް ބުނެފައި ވެއެވެ.

މި ޚަބަރާއި ގުޅޭ ލިންކް: https://odishabytes.com/40-youths-stuck-in-maldives-on-job-promise-plead-for-safe-return-to-odisha/amp/