ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި މުހައްމަދު ނިހާދު ސަސްޕެންޑު ކޮށްފިއެވެ.

އޭނާ ސަސްޕެންޑުކޮށްފައި މިވަނީ ޕީއެންސީން ޑިސެމްބަރ 23 ވަނަ ދުވަހުގެ ރޭ ބޭއްވި ހަރުގެ ޖަލްސާގައި ދެއްކެވި ވާހަކައަކާއި ގުޅިގެންނެވެ.

ކޮންގްރެސް ޕާޓީން ހ. ވެޔޮވިލާގައި ބޭއްވި ހަރުގެ ޖަލްސާގައި އޭނާ ވަނީ ރާއްޖެއަށް މިއަހަރު ޒިޔާރަތްކުރާ ފަތުރުވެރިންގެ އަދަދު ދެ މިލިއަނާ ގާތްކުރަމުން އަންނައިރު، ފަތުރުވެރި ކަމަށް ހުރަސް އެޅުމަށް އެމްޑީޕީ އިސްވެ އޮވެ މަސައްކަތްތަކެއް ކުރަމުންދާ ކަމަށެވެ.

އެގޮތުން މާލެ ކައިރީގައި އެއް ފަޅުތެރެއެއްގައި އޮތް ތިން ރިސޯޓެއްގައި އެމްޑީޕީން ބައްދަލުވުމެއް ބާއްވަން އެދުމުން މި ދުވަސްކޮޅު ރިސޯޓް ފުލްވެފައިވާތީ ނުބޭއްވޭނެ ކަމަށް އެންގުމުން ހުއްދަ ނުލިބުނަސް އެ ރިސޯޓަށް އެ ޕާޓީން އަރާނެ ކަމުގެ އިންޒާރު ދީފައިވާ ކަމަށް ނިހާދު ވަނީ ތުހުމަތުކުރައްވާފައެވެ.

އޭނާ ތުހުމަތު ކުރައްވާފައިވާ އެ ރިސޯޓަކަށް އެމްޑީޕީން އެރުމަށް ނިންމާފައިވަނީ މިއަދު ހަވީރުއެވެ. އަދި އެކަމުގެ ފަހަތުގައި ހުންނެވީ އެމްޑީޕީގެ ޗެއަރޕާރސަން ފައްޔާޟު އިސްމާއިލް ކަމަށް ވެސް ވަނީ ތުހުމަތު ކުރައްވާފައެވެ.

ނިހާދުގެ މި ވާހަކަތަކާއި ގުޅިގެން ސިޔާސީ އިދިކޮޅު އެންމެބޮޑު ޕާޓީ، އެމްޑީޕީން ނެރުނު ނޫސްބަޔާނެއްގައި ބުނީ މިއީ ޓޫރިޒަމް މިނިސްޓްރީގެ ސްޓޭޓް މިނިސްޓަރެއްގެ މަގާމުގައި ހުންނެވި ބޭފުޅަކު އެއްވެސް ހާލަތެއްގައި ކޮށްގެން ނުވާނެ ފަދަ ސީރިއަސް ތުހުމަތުތަކެއް ކަމަށެވެ. އަދި އެކަން ކުށްވެރިކުރާ ކަމަށެވެ.

"ކޮންގްރެސް ޕާޓީން މިފަދަ ހަގީގަތާ ހިލާފު ތުހުމަތުތައް ކުރަމުން ދިއުމަކީ ފޫނުބެއްދޭވަރުގެ ގެއްލުންތަކަކާ ރާއްޖޭގެ ފަތުރުވެރިކަމުގެ ސިނާއަތުން ކުރިމަތިލާން ޖެހިދާނެ ކަމެއް."

އެމްޑީޕީގެ ބަޔާނުގައި ވަނީ ސަރުކާރުގެ އިސް މަގާމުތަކުގައި ތިއްބެވި ބޭފުޅުންގެ ބަސްމަގު ހުރި ގޮތުން މި އަހަރު ވެސް ރާއްޖޭގެ ފަތުރުވެރިކަމުގެ ސިނާއަތަށް އެތައް ބިލިއަން ރުފިޔާގެ ގެއްލުމާ ކުރިމަތިލާން ޖެހިފައިވާކަން ފާހަގަކޮށްފައެވެ.

މީގެއިތުރުން ނިހާދު ދެއްކި ވާހަކަތައް ސީރިއަސް މައްސަލައެއްގެ ގޮތުގައި ބަލައި، ރާއްޖެއަށް ޒިޔާރަތްކުރާ ފަތުރުވެރިންނާއި ސިނާއަތުގައި މަސައްކަތް ކުރަމުންދާ ހުރިހައި މުވައްޒަފުންގެ ސަލާމަތާއި ރައްކާތެރިކަން ކަށަވަރުކޮށްދިނުމަށް ހުރިހައި އިދާރާތަކަށް ވަނީ ގޮވައިލާފައެވެ. އަދި ފަތުރުވެރިންނަށް ހިދުމަތްދޭ ހުރިހައި ވިޔަފާރިއެއްގެ ސަލާމަތާއި ރައްކާތެރިކަން ވެސް ކަށަވަރު ކޮށްދިނުމަށް ގޮވާލާފައި ވެއެވެ.