ރޯޑު ޑިވެލޮޕްމެންޓް ކޯޕަރޭޝަން (އާރްޑީސީ) އިން އާޓިފިޝަލް ބީޗް ސަރަހައްދުގެ ސްޓޯމް ވޯޓަރ ނެޓްވޯކް އަޕްގްރޭޑްކޮށް ކަނެކްޝަން މަސައްކަތް ނިންމައިފިއެވެ.

އެ ކުންފުނިން އެކްސްގައި ކޮށްފައިވާ ޕޯސްޓެއްގައި ވަނީ މިއީ މާލޭގެ މަގުތަކުގައި ފެންބޮޑުވާ މައްސަލައަށް ވަގުތީ ހައްލެއް ހޯދުމުގެ ގޮތުން ސަރުކާރުން ކުރިއަށް ގެންދާ މަޝްރޫއުގެ ދަށުން ކުރިއަށްގެންދާ މަސައްކަތެއް ކަމަށެވެ.

އެގޮތުން މަޖީދީމަގާއި ބޮޑުތަކުރުފާނު މަގު އިރުމަތީ ކޮޅު، އާޓިފިޝަލް ބީޗް ސަރަހައްދުގެ ސްޓޯރމް ވޯޓަރ ނެޓްވޯކް އަޕްގްރޭޑްކޮށް ކަނެކްޝަންތަކުގެ މަސައްކަތް މިހާރުނިމިފައިވާކަމަށް އެ ޕޯސްޓުގައި ވެއެވެ.

އާރްޑީސީން މިކަން ހާމަކޮށްފައިވާއިރު، މާލެ ސިޓީގެ މަގުތަކުގެ ހާލަތު ދެނެގަނެ މަޖީދީ މަގުގެ އެންމެ ބޮޑަށް ފެންބޮޑުވާ ސަރަހައްދު މަރާމާތު ކުރުމުގެ މަސައްކަތް މާލެ ސިޓީ ކައުންސިލުން ގެންދަނީ ދަނީ ކުރަމުންނެވެ.

މާލޭ ސިޓީ ކައުންސިލުން ބުނެފައިވަނީ މާލެސިޓީގެ މަގުތަކުގެ ހާލަތު ދެނެގަނެ ކުރިމަތިވާ މައްސަލަތައް ހައްލުކުރުމަށް ކުރި ސަރވޭގެ ތެރެއިން މަޖީދީ މަގުގެ އެންމެ ބޮޑަށް ފެންބޮޑުވާ ސަރަހައްދު ގޮތުގައި ފާހަގަވެފައި ވަނީ ޗާންދަނީމަގާއި ރަށްދެބައިމަގާއި ދެމެދު ކަމަށެވެ. އެގޮތުން އެ ސަރަހައްދު މަރާމާތުކުރުމުގެ މަސައްކަތް މިހާރުދަނީ ކުރަމުންނެވެ.