މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޮމްޕެނީ (އެމްއެމްޕީއާރްސީ) އިން ޑިޖިޓަލް ކެމްޕެއިންތައް އަންނަ އަހަރު އިތުރުކުރަން ނިންމާފައިވާކަން ހާމަކޮށްފިއެވެ.

އެ ކުންފުނިން މިކަން ހާމަކުރީ އަންނަ އަހަރަށް އެ ކުންފުނިން ރާވާފައިވާ ހަރަކާތްތަކުގެ މައުލޫމާތު ދިނުމަށް ޑިސެމްބަރ 29 ވަނަ ދުވަހު ބޭއްވި ނޫސްވެރިން ބައްދަލުވުމުގައެވެ.

ނޫސްވެރިންނަށް މައުލޫމާތު ދެއްވަމުން އެމްއެމްޕީއާރްސީގެ ެ ޗެއަރޕާސަން އަބްދުﷲ ޤިޔާސް ވިދާޅުވީ މިއީ އެކި ގައުމުތަކުގައި ބާއްވާ ފަތުރުވެރިކަމުގެ ފެއަރތަކުގައި ބައިވެރިވުމަށް ކުރާ ހަރަދުކުޑަކުރުމަށް އަޅުއްވާ ފިޔަވަޅެއް ކަމަށެވެ.

އެހެންވެ، އަންނައަހަރު އެންމެ ބޮޑު އިސްކަމެއް ދޭނީ އޮންލައިން ޑިޖިޓަލް ކެމްޕެއިންތަކަކަށް ކަމަށް އޭނާ ވިދާޅުވިއެވެ.

"މިއަހަރު ހާސިލްކުރަން ކަނޑައެޅި އަމާޒުތައް މިވަނީ ހާސިލްކުރެވިފަ. ކުރިއަށް އޮތް އަހަރު ރާއްޖެ ޕްރޮމޯޓް ކުރުމުގެ މަސައްކަތް އިތުރަށް ހަރުދަނާ ކުރުމަށް ގިނަ ކަންތައްތަކެއް ވަނީ ރޭވިފަ."

އޭނާ އިތުރަށް ވިދާޅުވީ ކޮންމެ އަހަރަކު ވެސް އެ ކުންފުނީގެ ވަސީލަތްތަކުގެ 80 އިންސައްތަ ބޭނުންކުރަނީ ޓްރެވެލް ޓްރޭޑް ފެއަރތަކަށް ކަމަށެވެ.

"އޮންލައިން މިނީ ކެމްޕެއިނެއް" ދާދިފަހުން ކުރިއަށް ގެންދިޔަކަން ފާހަގަކޮށް އެމްއެމްޕީއާރްސީން ބުނީ އެ ކެމްޕެއިން ތެރެއިން ވެސް 22 މިލިއަން އިމްޕްރެޝަން އެއްމަސް ދުވަހުގެ ތެރޭގައި ލިބުނު ކަމަށެވެ. އެ ކެމްޕެއިންގެ ކާމީޔާބީއަށް ބިނާކޮށް، މީސްމީޑިއާގެ އެކި މަންސަތަކާއި ބުކިންގ ޕްލެޓްފޯމްތަކާއި ގުޅިގެން މާކެޓިންގ ކެމްޕެއިންތައް ކުރިއަށް ގެންދަން ރޭވިފައިވާކަމަށެވެ.