މިހާރުކުރިއަށްދާ ޔުއެފާ ޔޫރޯ ފުޓްބޯޅަ މުބާރާތުގައި ރޭ ކުޅުނު ދެ މެޗުގެ ތެރެއިން ފުރަތަމަ މެޗުގައި އުނދަގޫ މޮޅަކާއެކު، އިންގްލެންޑުން ކްއާޓަރ ފައިނަލަށް ދަތުރުކޮށްފިއެވެ.

ގަދަ 16 ޓީމުގެ މެދުގައި ކުރިއަށްދާ ރައުންޑް އޮފް ސިކްސްޓީންގައި އިންގްލެންޑު ރޭ ކުޅުނީ ސްލޮވާކިއާ އެވެ. މި މެޗުގައި ފުރަތަމަ ލަނޑު ޖަހާ ލީޑު ނެގީ މެޗުގެ 25 ވަނަ މިނެޓުގައެވެ. އިވާން ޝްރަންޒް ޖަހައިދިން މި ގޯލާއެކު މެޗުގެ ފުރިހަމަ ވަގުތު ހަމަވެ، އިތުރުވަގުތު ވެސް ނިމެން ގާތްވެފައިވަނިކޮށް އިންގްލެންޑުން ނަތީޖާ އެއްވަރުކުރީ ބެލިންގަމް ޖެހި މޮޅު ގޯލުންނެވެ.

ފުރިހަމަ ވަގުތު ހަމަވިއިރު، ދެޓީމު އެއްވަރުވެފައި އޮތުމުން ނަތީޖާ ނެރުމަށް ވަނީ 15 މިނެޓުގެ ދެ ހާފު ކުޅެފައެވެ. އިންގްލެންޑުގެ މައްޗަށް ނަތީޖާ އަނބުރާލީ ފުރަތަމަ 15 މިނެޓުގެ ކުރީކޮޅު ހެރީ ކޭން ޖެހި ލަނޑުންނެވެ. އެގޮތުން 2 ލަނޑު 1 ލަނޑުން މި މެޗު ކާމިޔާބުކުރީ އިނގިރޭސިންނެވެ.

ކުއާޓަރ ފައިނަލުގައި އިންގްލެންޑް ބައްދަލުކުރާނީ ސްވިޒަލެންޑާއެވެ. ސްވިޒަލޭންޑަކީ އެންމެ ފަހުގެ ޗެމްޕިއަން އިޓަލީ މި މުބާރާތުން ކަޓުވާލި ޓީމެވެ.

ޔޫރޯ ފުޓްބޯޅަ މުބާރާތުގައި ރޭ ދެން ކުޅުނީ ސްޕެއިން އާއި ޖޯޖިއާ އެވެ. މި މެޗު 4 ލަނޑު 1 ލަނޑުން ފަސޭހަކަމާއެކު ކާމިޔާބުކުރީ ސްޕެއިންއެެވެ.

މި މެޗުން ޖޯޖިއާ ބަލިވިޔަސް، މުޅިން އަލަށް ޔޫރޯ ފުޓްބޯޅަ މުބާރާތުގައި ވާދަކުރި ޖޯޖިއާ އިން ދެވަނަބުރުގެ ޖާގަ ކަށަވަރުކުރީ ގްރޫޕް ސްޓޭޖުގައި ޕޯޗުގަލް ބަލިކުރުމަށް ފަހުކަން ފާހަގަކޮށްލަން ޖެހެއެވެ.

ރޭގެ މި މެޗުގައި ފުރަތަމަ ގޯލު ޖަހައި ލީޑު ނެގީވެސް ޖޯޖިއާ އިންނެވެ. އެއީ މެޗުގެ 18 ވަނަ މިނެޓުގައި ސްޕެއިންގެ ގޯލު ކުރިމައްޗަށް ހުރަސްވީ ބޯޅަ ދިފާއުކުރަން އުޅުމުގެ ތެރޭގައި ސްޕެއިންގެ ޑިފެންޑަރ ރޮބިން ލެ ނޯމަންޑް ގައިގައި ޖެހިފައި، ބައިކޮޅަށް ވަން ގޯލުންނެެވެ.

އެހެންނަަމަވެސް ސްޕެއިނުން މެޗުގެ ނަތީޖާ ހަމަހަމަ ކުރީ 39 ވަނަ މިނެޓުގައި ރޮޑްރީ ޖެހި ގޯލުންނެވެ. މި ނަތީޖާގައި ފުރަތަމަ ހާފު ނިންމާލިއިރު، ދެވަނަ ހާފު ފަށައިގެން ހަ ވަނަ މިނެޓުގެ ތެރޭގައި ސްޕެއިނަށް ލީޑު ނަގައިދިނީ ފަބިއަން ރުއިޒްއެވެ.

ސްޕެއިންގެ ތިންވަނަ ލަނޑު 75 ވަނަ މިނެޓުގައި ނިކޯ ވިލިއަމްސް ޖަހައިދިންއިރު، ހަތަރުވަނަ ލަނޑު 83 ވަނަ މިނެޓުގައި ޖަހައިދިނީ ޑެނީ އޯލްމޯއެވެ.

ކުއާޓަރ ފައިނަލުގައި ސްޕެއިން ބައްދަލުކުރަން ޖެހޭނީ ޖަރުމަނާއެވެ.